Կարող ա պարզվի, որ պետք է ինչ-որ շտամպ խփել պատվաստված քաղաքացիների անձնագրերում. Նիկոլ Փաշինյան
Շատ կարևոր է, որ մենք այսօրվանից թվայնացված տեղեկատվություն ունենանք պատվաստված քաղաքացիների մասին: Այս մասին այսօր՝ ապրիլի 29-ին, կառավարության նիստում հայտարարեց ՀՀ վարչապետի պաշտոնակատար Նիկոլ Փաշինյանը:
«Հետագայում դեռ չգիտենք, թե ինչ կարգեր կգործեն: Կարող ա պարզվի, որ թողարկվում է կանաչ անձնագիր, կամ անձնագրի մեջ ինչ-որ նշում է արվում և այլն: Մենք պետք է կարողանանք վայրկյանների ընթացքում գտնել պատվաստված քաղաքացիներին, եթե այդ ընթացակարգերը տեղայնացնելու անհրաժեշտություն լինի: Կարող ա պարզվի, որ պետք է անձնագրի մեջ ինչ-որ շտամպ խփել և այլն»,-ասաց նա:
ԱՆ նախարարի պաշտոնակատար Անահիտ Ավանեսյանը հայտնեց, որ արդեն մշակված հավելված կա, որը երեկ գրանցվել է Ափսթորում. «Քաղաքացիները կստանան կանաչ բարքոդով հավելվածով հավաստումն իրենց պատվաստման»:
Նա նաև ասաց, որ պատվաստման ամբողջ գործընթացը գրանցվում է էլեկտրոնային հարթակում, որտեղից ինֆորմացիան ավտոմատ կերպով արտահայտվելու է հավելվածով:
Այսօր կամ վաղը ԱՆ կայքում կլինի ուղեցույց, թե ինչպես պետք է հավելվածը ներբեռնել ու ինչպես դրանից օգտվել:
Հետևեք մեզ Facebook-ում