Սյունիքը Փաշինյանին չի ընդունում. նախկին մարզպետ
Քանի դեռ Նիկոլ Փաշինյանը զբաղեցնում է վարչապետի աթոռը` Ալիևի սպառնալիքները Սյունիքում միջանցք բացելու վերաբերյալ իրատեսական են: Այս մասին «Փաստինֆո»-ի հետ զրույցում ասաց Սյունիքի նախկին մարզպետ Վահե Հակոբյանը:
Ինչպես արդեն հայտնել ենք՝ Ադրբեջանի նախագահը հայտարարել է, թե իրենք իրագործելու են «Զանգեզուրի» միջանցքի ծրագիրը` անկախ նրանից Հայաստանն ուզում է, թե ոչ:
«Եթե ցանկանա Հայաստանը, այդ հարցը կարելի է լուծել հեշտ, եթե չցանկանա՝ մենք դա ուժով կլուծենք։ Ես պատերազմից առաջ և պատերազմի ժամանակ ասել եմ, որ նրանք պետք է հոժար կամքով դուրս գան մեր հողից, այլապես մենք նրանց դուրս կշպրտենք։ Այդպես էլ եղավ։ Նույնը կլինի նաև Զանգեզուրի միջանցքի հետ»,- հայտարարել է Ալիեւը։
«Փաստինֆո»-ի հարցին, արդյոք Սյունիքն այսօր պատրաստ է դիմակայել ադրբեջանական ագրեսիային՝ նախկին մարզպետը նշեց. «Նախ պետք է հասկանալ, թե Սյունիքի ղեկավարություն ասելով, մենք ում ի նկատի ունենք: Մելիքսեթ Պողոսյանը Սյունիքի ղեկավարը չէ, նա զբաղեցնում է մարզպետի աթոռը: Նրա մոտ լավ է ստացվում միայն ոչխարներ հաշվելը: Մարզում ամբողջ ղեկավարությունն իրականացնում են համայնքի ղեկավարները, ընտրված, ոչ թե նշանակված,- ընդգծեց Հակոբյանը:
Նկատենք, որ մինչեւ Ալիեւը սպառնում էր ուժ գործադրել՝ Զանգեզուրը վերցնելու համար, Նիկոլ Փաշինյանը շտապել է գաղտնի այցելել Սյունիք՝ մեծաթիվ հատուկ ջոկատայինների, ոստիկանների ուղեկցությամբ, որի ժամանակ արձանագրվեցին բախումներ։ Գրեթե բոլոր բնակավայրերում նրան դիմավորել են սուլոցներով ու հայհոյանքներով, իսկ ժողովրդական ընդվզումը Փաշինյանը հանձնարարել է լռեցնել ուժայինների միջոցով։
«Ես չեմ կարող հասկանալ, թե ինչու է Փաշինյանը գնացել Սյունիք, քանի որ նա շատ անտրամաբանական քայլերով շարժվող մարդ է, նրա տրամաբանությունը հասկանալ հնարավոր չէ: Ես ինքս 3 տարի առաջ հրաժարվել եմ հասկանալ նրա տրամաբանությունը: Մի գուցե նա ուզում էր ցույց տալ, որ կարող է գնալ Սյունիք և շփվել բնակիչների հետ: Բայց քաղաքացիների այսպիսի արձագանք՝ սպասելի էր: Սյունիքն իրեն չի ընդունում», - շեշտեց Հակոբյան:
Հետևեք մեզ Facebook-ում