Հայկական կոնյակի փառատոնը չի հետաձգվում. այն կկայանա մայիսի 7-ին

Տուրիզմի զարգացման բարեգործական հիմնադրամը տեղեկացնում է

Տուրիզմի զարգացման բարեգործական հիմնադրամը տեղեկացնում է, որ վերջին օրերին տարբեր լրատվամիջոցներով տարածված տեղեկատվությունն այն մասին, որ Հայկական կոնյակի փառատոնը հետաձգվում է, մասնավորապես՝ իբր տեղափոխվում է մայիս ամսից հոկտեմբեր, չի համապատասխանում իրականությանը:

Տուրիզմի զարգացման բարեգործական հիմնադրամի՝ ՀՀ զբոսաշրջության պետական կոմիտեի հետ համատեղ կազմակերպվող Հայկական կոնյակի փառատոնի կայանալու օրը և վայրը մնում են անփոփոխ. Փառատոնը կկայանա ս.թ. մայիսի 7-ին՝ ք.Ծաղկաձորում:

Փառատոնի նպատակն է՝ հայկական կոնյակի միջազգային ճանաչման բարձրացումը, ինչպես նաև ավանդական և նոր շուկաներում դրա հանրայնացումը:

Փառատոնին իրենց տաղավարներով կներկայանան կոնյակի հայաստանյան առաջատար արտադրողները:

Փառատոնի ընթացքում կլինի հյուրասիրություն՝ հայկական ազգային խոհանոցի ողջ շքեղությամբ: գործեն նաև բազմազան տաղավարներ (հուշանվերներ, ձեռքի աշխատանքներ, արվեստի ստեղծագործություններ, զարդեր, հագուստ և այլն):

Նախատեսվում է շոու ծրագիր, որն իրենց ելույթներով յուրովի կգեղեցկացնեն հայկական էստրադայի աստղեր Արամ MP3-ն և Իվետա Մուկուչյանը, ինչպես նաև DJ Smoke-ը:

Փառատոնը կավարտվի գեղեցիկ տոնական հրավառությամբ:

Մուտքն անվճար է: Սպասում ենք բոլորին: