Մոսկվայում մեկնարկել է Նիկոլ Փաշինյանի եւ Վլադիմիր Պուտինի հանդիպումը. Տեսանյութ

Ռուսաստանի եւ Հայաստանի միջեւ առեւտրաշրջանառության ծավալը, որը նվազել է կորոնավիրուսային համավարակի պատճառով, մոտ ապագայում կարող է վերականգնվել եւ աճել: Այս մասին հայտարարել է ՌԴ նախագահ Վլադիմիր Պուտինը Մոսկվայում Հայաստանի վարչապետ Նիկոլ Փաշինյանի հետ հանդիպմանը:

Ռուսաստանի ղեկավարը երկու երկրների միջեւ ապրանքաշրջանառության ծավալը զգալի է անվանել՝ նշելով, որ 2020 թվականին մի շարք պատճառներով, առաջին հերթին՝ կորոնավիրուսի համավարակի պատճառով, այս ցուցանիշի որոշակի անկում է նկատվել: «Համոզված եմ, որ շատ մոտ ապագայում մենք կարող ենք ոչ միայն վերականգնել այս ծավալը, այլեւ՝ առաջ շարժվել»,- ասել է Պուտինը:

Ռուսաստանի Դաշնային մաքսային ծառայության տվյալների համաձայն՝ Ռուսաստանի Դաշնության եւ Հայաստանի միջեւ ապրանքաշրջանառությունը 2020 թվականին ավելի քան 2,3 միլիարդ դոլար է կազմել՝ 2019-ի համեմատ նվազելով 9.6 տոկոսով:

***

Մոսկվայում քիչ առաջ մեկնարկել է վարչապետ Նիկոլ Փաշինյանի եւ ՌԴ նախագահ Վլադիմիր Պուտինի հանդիպումը։ Այս մասին Ֆեյսբուքի իր էջում հայտնել է  Մանե Գևորգյանը։

Ավելի վաղ Մանե Գեւորգյանն ասել էր, որ երկու երկրների ղեկավարները քննարկելու են հայ-ռուսական հարաբերությունների օրակարգում գտնվող ռազմավարական նշանակություն ունեցող հարցեր, մասնավորապես՝ առեւտրատնտեսական կապեր, էներգետիկա, անվտանգություն, ռազմավարական ներդրումներ, առողջապահություն:

 Փաշինյանի եւ ՌԴ նախագահի հանդիպման օրակարգը ներառում է նաեւ հարցեր, որոնք վերաբերում են նոյեմբերի 9-ի եռակողմ հայտարարությունում ամրագրված դրույթների կատարմանը, դրանց ընթացքին, հումանիտար բնույթի խնդիրներին։