Պուտինն ու Փաշինյանը կքննարկեն ռազմավարական գործակցության զարգացմանն առնչվող հարցեր

Մոսկվայում ապրիլի 7-ին Ռուսաստանի Դաշնության նախագահ Վլադիմիր Պուտինն ու Հայաստանի Հանրապետության վարչապետ Նիկոլ Փաշինյանը կքննարկեն երկու երկրների ռազմավարական գործընկերությանն առնչվող հարցեր: Այս մասին հայտնում է «РИА Новости»-ն հղելով Կրեմլի մամուլի ծառայությունը:

«Ապրիլի յոթին Մոսկվայում բանակցություններ տեղի կունենան ՌԴ նախագահ Վլադիմիր Պուտինի և ՀՀ վարչապետ Նիկոլ Փաշինյանի միջև, որն աշխատանքային այցով գտնվելու է Ռուսաստանում: Նախատեսվում է քննարկել ռուս-հայկական ռազմավարական գործընկերության և համագործակցությանն առնչվող ակտուալ հարցեր, ինչպես նաև եվրասիական տարածքում ինտեգրացիոն միավորումներում փոխգործակցության հեռանկարները»,-ասվում է հաղորդագրության մեջ:

Ավելի վաղ Պուտին-Փաշինյան հանդիպման մասին հայտարարել էր նաև ՌԴ նախագահի մամուլի խոսնակ Դմիտրի Պեսկովը՝ նշելով, որ քննարկվելու է Հայաստանի, Ռուսաստանի և Ադրբեջանի միջև եռակողմ պայմանավորվածությունների ու եռակողմ փաստաթղթի կյանքի կոչման ընթացքը, ինչպես նաև հարցեր՝ կապված Անդրկովկասում տրանսպորտային ենթակառուցվածքների ապաշրջափակման, Հայաստանում սկսված ընտրական գործընթացի, ռուս-հայկական համագործակցության ակտուալ հարցերի հետ:

Zham.am