Գլենդելի հայազգի նոր քաղաքապետը ֆինանսական միջոցներ է փնտրում Հայաստանին օգնություն տրամադրելու համար

Ինչպես հաղորդում է «Ասպարեզ»-ը, մայիսի 1ին, Գլենդելի քաղխորհրդի անդամները միաձայն նոր քաղաքապետ ընտրեցին քաղխորհրդի ներկայիա անդամ Վարդան Կարապետյանին: Խոսելով առաջիկա գործունեութեան մասին, Կարապետյանը նշեց, որ գործընկերների հետ միասին կաշխատի քաղաքն առավել բարեկեցիկ եւ ապահով դարձնելու ուղղությամբ, հետամուտ կլինի ընթացիկ նախագծերի իրականացմանը՝ հայտարարված ժամկետներում:

Վարդան Կարապետյանը նաեւ տեղեկացրեց, որ աշխատում է երկու հրշեջ մեքենա Հայաստան ուղարկելու համար համապատասխան ֆինանսական միջոցներ հայթայթելու ուղղությամբ:

Յիշեցնենք, որ Գլենդելի քաղաքապետն ընտրվում է քաղխորհրդի անդամների կողմից՝ մեկ տարի պաշտոնավարման ժամկետով:

Մայիսի 1-ին, Գլենդելի քաղաքապետարանում, պաշտոնները ստանձնեցին քաղխորհրդում վերընտրված Զարեհ Սինանյանն ու Արա Նաջարյանը, ինչպէս նաեւ՝ առաջին անգամ ընտրված Վրեժ Աղաջանյանը, նաեւ՝ Արդի Քասախյանը, ով կշարունակի գործունենությունը որպես քաղաքապետարանի քարտուղար, եւ Րաֆֆի Մանուկյանը՝ որպես գանձապահ:

Քաղաքապետարանում տեղի ունեցավ նաեւ Գլենդելի Համայնքային քոլեջի հոգաբարձուների խորհրդում ընտրված անդամներ՝ Արմինե Հակոբեանի, Իւետ Վարդանյան-Դեւիսի, Էն Ռասֆորդի, ինչպէս նաեւ՝ Գլենդելի Միացյալ Կրթաշրջանի խորհրդում վերընտրվւած՝ Արմինա Կարապետյանի, Գրեգ Գրիգորյանի, եւ նոր ընտրված՝ Շանթ Սահակյանի երդմնակալության արարողությունը:

Մանրամասները՝ «Ասպարեզ»