Պետդումայի պատգամավորներն առաջարկում են օդաչու Ալեքսանդր Ակոպովին ՌԴ քաղաքացիություն շնորհել

Պետդումայի պատգամավորներն առաջարկում են Ստամբուլի օդանավակայանում անցած շաբաթավերջին խոշոր ավիավթարը կանխած օդաչու Ալեքսանդր Ակոպովին արագացված կարգով Ռուսաստանի քաղաքացիություն շնորհել:

Հայազգի օդաչուն, հիշեցնենք, կարողացել էր ապահովել կարկուտից լրջորեն վնասված օդանավի վայրէջքը` փրկելով 120 ուղևորների և անձնակազմի վեց անդամների կյանքը:

Ուկրաինայի քաղաքացի հանդիսացող հայազգի օդաչուին հաջորդ օրն արդեն զանգահարել էր նախագահ Պետրո Պորոշենկոն և հայտնել, որ նրան շնորհել է երկրի բարձրագույն պետական պարգևներից մեկը` Արիության շքանշանը:

Սոցիալական ցանցերի ուկրաինացի օգտատերերը, սակայն, շատ արագ հայտնաբերեցին Ակոպովի ֆեյսբուքյան էջը և պարզեցին, որ շքանշանակիր օդաչուն կարծես թե բավական դրական վերաբերմունք ունի Ռուսաստանի հանդեպ:

Ֆեյսբուքում օդաչուի էջի գլխավոր նկարը մի կոլաժ է, որում պատկերված են ինքը` Ակոպովը և Ռուսաստանի արտաքին գործերի նախարար Սերգեյ Լավրովը:

«Այդ նկարը վկայում է, որ Ակոպովը բարիկադների հակառակ կողմում է», - գրել էր ուկրաինացի իրավապաշտպան Սերգեյ Նաումովիչը:

Մեկ այլ օգտատեր էլ հավելել էր. - «Ցավալի է, երբ մարդու մասնագիտական հատկանիշներն ավելի բարձր են, քան՝ բարոյականները»:

Ալեքսանդր Ակոպովը, սակայն, պնդում է, որ իրեն ուղղված ռուսամետության մեղադրանքներն անհիմն են:

«Այդ լուսանկարի հեղինակը մեր բորտուղեկցորդուհիներից մեկն էր: Լուսանկարում ես պարզապես շատ նման եմ Լավրովին, ուստի Լավրովի նկարը տեղադրել էի զուտ համեմատության համար», - հայտարարում էր Ակոպովը Strana.ua կայքին տված հարցազրույցում` հավելելով. - «Հնչած քննադատության պատճառով Ֆեյսբուքում տեղադրված այդ լուսանկարը հեռացնել չեմ պատրաստվում»:

Ռուսաստանում Ակոպովին ուղղված քննադատությունը հակադարձ վրդովմունքի ալիք բարձրացրեց. արտգործնախարարությունը սոցիալական ցանցերի միջոցով դիմեց Ակոպովին` կոչ անելով նրան տեղափոխվել Ռուսաստան:

«Ալեքսանդր, այն, ինչ Դուք եք արել, դուրս է քաղաքականությունից: Երախտապարտ ենք Ձեր պրոֆեսիոնալիզմի համար: Եթե Ձեզ շարունակեն քննադատել հայրենիքում, եկեք Ռուսաստան, ուրախությամբ կդիմավորենք», - հայտարարում էին Ռուսաստանի ԱԳՆ ներկայացուցիչները:

Հայազգի օդաչուն կյանքի մեծ մասն ապրել է Դոնեցկում: Արևելյան Ուկրաինայում սկիզբ առած պատերազմից հետո նա տեղափոխվել է Ստամբուլ, որտեղ արդեն երեք տարի է ինչ աշխատում է թուրքական Global Atlas ավիաընկերությունում:

Չարաբաստիկ չվերթն էլ, որի հրամանատարն էր Ակոպովը, Ստամբուլից ուղևորվում էր Հյուսիսային Կիպրոսի թուրքական հանրապետություն:

Պետական այս միավորը Թուրքիայից բացի որևէ այլ պետություն չի ճանաչում, Հյուսիսային Կիպրոս թռիչքներ են իրականացնում բացառապես թուրքական ավիաընկերությունները:

Աղբյուրը` Azatutyun.am