Դարձրեք ռուսերենը պաշտոնական լեզու և օրենքը կներառի նաև Հայաստանը. Վոլոդին

Պետդումայի խոսնակ Վյաչեսլավ Վոլոդինը հայտարարել է, որ հայկական վարորդական իրավունքը կարող է Ռուսաստանում օրինական բնույթ կրել, եթե Հայաստանում ռուսաց լեզուն պաշտոնականի կարգավիճակ ստանա:

Ռուսաստանում հայկական վարորդական իրավունքի օրինականացման թեման Վոլոդինի հետ հանդիպման ժամանակ բարձրացրել է Հայաստանի ԱԺ նախագահ Արա Բաբլոյանը: Բաբլոյանը նշել է, որ Կիրգիզիայի և Բելառուսիայի քաղաքացիները Ռուսաստանում օգտվում են օրինական իրավունքներից, որին ի պատասխան պետդումայի խոսնակը պատասխանել է, որ այդ երկրների քաղաքացիները ճանապարհային տրանսպորտի կանոնները սովորել են ռուսաց լեզվով, և որ նրանցից շատերը Ռուսաստանում աշխատում են որպես տաքսիստներ, հասարակական տրանսպորտի վարորդներ, գիտեն կանոնները և նրանց աշխատանքում իհարկե օգնում է ռուսաց լեզվի գիտելիքները:

Բաբլոյանի պատասխանին, թե չկա մեկ հայկական դպրոց, որտեղ չուսուցանվի ռուսերենը, որի շնորհիվ հայերը շատ լավ գիտեն ռուսերեն, Վոլոդինն ասել է`«Այդ դեպքում ես կարող եմ միայն մեկ բան ասել. դարձրեք այն պաշտոնական լեզու և օրենքը մեխանիկորեն կներառի նաև Հայաստանի Հանրապետությունը»:

Վոլոդինը նաև նշել է, որ Կիրգիզիայի և Բելառուսիայի քաղաքացիների իրավունքների ճանաչման ռուսական օրենքը հիմնված է այն որոշումների վրա, որոնք ընդունվել են  երկրներում, որտեղ ռուսերենը սահմանադրորեն համարվում է պաշտոնական:

Հիշեցնենք, որ 2017թ հունիսի 1-ից Ռուսաստանում արգելվում է աշխատել ազգային վարորդական իրավունքով:  

Zham.am