Ո՛չ Կառավարությունից է մարդ եկել, ո՛չ այլ բարձրաստիճան պաշտոնյա՝ ծանոթանալու Խնձորեսկի խնդիրներին. գյուղը զրկվել է արոտավայրերից. Ներքին Խնձորեսկի վարչական ղեկավար

Համայնքապետը միշտ մեզ հետ է, բայց այսքան ժամանակ, բացի նրանից, չեմ տեսել, որ ուրիշ մեկը հետաքրքրվի գյուղում առաջացած խնդիրներով, ո՛չ Կառավարությունից է մարդ եկել, ո՛չ այլ  բարձրաստիճան պաշտոնյա: Այս մասին այսօր Tert.am-ի հետ զրույցում ասաց Ներքին Խնձորեսկի վարչական ղեկավար Երվանդ Մալունցը:

«Ես քաղաքականությամբ ոչ զբաղվել եմ, ոչ էլ ուզում եմ զբաղվել, բայց այսքան ժամանակ որևէ մեկից ոչ մի բան չեմ տեսել: Գյուղը զրկվում է արոտավայրերից, շատերն իրենց անասուններին են վաճառում, և պարզ չէ, թե այսուհետ ինչով են զբաղվելու նրանք: Խնձորեսկը կից է եղել ազատագրված տարածքներին, ժողովուրդն օգտվում էր այդ տարածքներից, արոտավայրերից, ստացվում է, որ հիմա դրանից էլ են զրկվել»,-ասաց նա:

Հիշեցնենք, որ ավելի վաղ Երվանդ Մալունցը մտահոգություն էր հայտնել այն առիթով, որ հայ-ադրբեջանական սահմանը գյուղից մետր այնկողմ է:

«Այս պահին որևէ հստակ բան չկա, վերջնական սահմանազատում չի եղել: Մենք մեր կողմում ենք կանգնած, նրանք էլ եկել, մեր դիմաց են կանգնել, չափագրում դեռ չի եղել»,-ասաց նա:

Հիշեցնենք, որ Նիկոլ Փաշինյանը նոյեմբերի 10-ին ստորագրել է եռակողմ հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը՝ բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։

Ըստ այդ հայտարարության՝ Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորախումբ, այդ թվում՝ հրաձգային զենքով զինված 1960 զինծառայող, 90 զրահամեքենա, 380 միավոր ավտոմոբիլային և հատուկ տեխնիկա:

Աղբյուր՝ Tert.am