Բանկերն առանց հարկային հետևանքների կարող են ներել պատերազմում հաշմանդամ դարձած կամ զոհված անձանց վարկերը, այդ թվում՝ մայր գումարները․ Տեսանյութ

Ազգային ժողովի արտահերթ նիստին ֆինանսների նախարարին տեղակալ Արման Պողոսյանը առաջին ընթերցմամբ ներկայացրեց Հարկային օրենսգրքում փոփոխություններ կատարելու մասին նախագիծը, որով առաջարկվում է, որ բանկերը և վարկային կազմակերպությունները կարողանան առանց հարկային հետևանքներ կրելու ներել ռազմական գործողությունների հետևանքով զոհված կամ հաշմանդամություն ձեռք բերած ֆիզիկական անձանց վարկային պարտավորությունները:

«Նկատի ունենք ոչ միայն տույժերն ու տուգանքները, այլ նաև վարկի մայր գումարները»,-ասաց  նա: Փոխնախարարը նշեց, որ օրենքի ընդունումից հետո հնարավորություն կընձեռվի, որ առանց հարկային հետևանքի ներել ոչ միայն հենց մարտական գործողությունների մասնակցած զոհված կամ հաշմանդամություն ձեռք բերած անձանց վարկային պարտավորությունները, այլ նաև նրանց հետ առաջին փոխկապակցված անձանց՝ ծնողների՝ համատեղությամբ ապրող, զավակների՝ համատեղությամբ ապրող, և ամուսնու: «Նախագծով հնարավորություն է տրվում ներել ոչ միայն անհուսալի ճանաչված, այլ նաև դեռևս անհուսալի չճանաչված վարկերը, որոնք հաշվեկշռում են»,-ասաց նա:

Արման Պողոսյանն ասաց, որ նախագծի գաղափարախոսությունն այն է, որ հնարավորություն է ընձեռվում, որ վարկատու բանկերը և կազմակերպությունները ներեն այդ պարտավորությունները, միաժամանակ պետությունն այդ ներելու հետևանքով ստացվող հետևանքների կամ կորցվող եկամուտների բեռի մի մասը՝ հարկին համապատասխանող մասը, վերցնում է իր վրա:

Նախագիծը ընդունվեց առաջին ընթերցմամբ միաձայն՝ 83 կողմ ձայնով:

Մանրամասները՝ Tert.am-ին