Արցախի Հանրապետությունում քուրդ զինյալներ տեղակայելու մասին տեղեկատվությունը Ադրբեջանի հերթական սուտն է. Վահրամ Պողոսյան
Արցախի Հանրապետությունում քուրդ զինյալներ տեղակայելու մասին տեղեկատվությունը Ադրբեջանի հերթական սուտն է, այն ապատեղեկատվություն է: NEWS.am-ի հետ զրույցում այսպես մեկնաբանեց ադրբեջանական մամուլում տարածված տեղեկությունը Արցախի նախագահի մամուլի խոսնակ Վահրամ Պողոսյանը:
«Նման տեղեկություններ տարածելով Ադրբեջանը փորձում է հակադրվել այն հաստատված տեղեկություններին, որ իրենց բանակը համալրվում է Սիրիայից եկած ծայրահեղականներով: Այնինչ դա հատատված է, նաեւ միջազգային մամուլն է գրում սիրիայից ծայրահեղական ուժերի տեղակայումը Ադրբեջանում: Ես կարող եմ ասել, որ դա բացարձակ սուտ է եւ չի համապատասխանում իրականությանը», - շեշտեց նա:
Վահրամ Պողոսյանի խոսքով`Ադրբեջանի զինված ուժերի կազմում ծայրահեղական ուժերի լինելու մասին է վկայում նաեւ ապրիլյան գործողությունների ժամանակ հայ զինվորների նկատմամբ կատարված վայրագությունները, որոնք բնորոշ են իսլամիստ ծայրահեղականներին:
Անդրադառնալով Ադրբեջանի Պաշտպանության նախարարի հայտարարությանը այն մասին, որ Հայաստանը պատրաստվում է պատերազմի, Վահրամ Պողոսյանը նշեց, որ Հայաաստանը երբեք չի հայտարարել այլ երկրի սահման ներխուժելու մասին, իսկ Հայաստանում զիննված ուժերի կատարելագործումը եւ աշխարհազորի ստեղծումը միայն մեկ նպատակ ունի`պահպանել երկրի սահմաններն անառիկ:
Հետևեք մեզ Facebook-ում