ԱԺ-ն քանդում է հաշվեքննիչ պալատի շենքն ու նոր մասնաշենք կառուցում. Նախագծման համար մրցույթ է հայտարարվել

ԱԺ հաշվեքննիչ պալատի շենքը կքանդվի և փոխարենը նորը կկառուցվի։ «Փաստինֆո»-ի տեղեկություններով՝ խոսքը բավական թանկարժեք գործարքի մասին է։ Առայժմ նախագծման և նախահաշվարկի փուլն է։

Հաշվեքննիչ պալատը Ազգային ժողովի երկրորդ մասնաշենքի հետնամասում է գտնվում։ ՀՀ քաղաքաշինության կոմիտեն հայտարարում է բաց մրցույթ, որն իրականացվում է մեկ փուլով։

Արդյունքում ընտրված մասնակցին սահմանված կարգով կառաջարկվի կնքել ՀՀ Ազգային ժողովի նոր մասնաշենքի կառուցման նախագծանախահաշվային փաստաթղթերի կազմման խորհրդատվական ծառայության մատուցման պայմանագիր։

Հայտերի բացումը տեղի կունենա էլեկտրոնային ձևով` հոկտեմբերի 14-ին ժամը 11:30-ին։

ՀՀ կառավարության 2020 թվականի հունիսի 18-ի N 1029-Ն որոշման համաձայն՝ ՀՀ Ազգային ժողովի բյուջեով նախատեսվել է խրախուսման ֆոնդ 1 800 000 ՀՀ դրամի չափով, որը բաշխվելու է մրցույթի արդյունքում բավարար գնահատված հայտերի էսքիզային առաջարկների համար առաջին երեք ամենաշատ բալեր ստացած մասնակիցներին՝ հետևյալ համամասնությամբ՝ առաջին տեղին – 1 000 000 ՀՀ դրամ, երկրորդ տեղին – 500 000 ՀՀ դրամ, երրորդ տեղին – 300 000 ՀՀ դրամ։

Աղբյուր` Փաստինֆո