BBC-ի հարցազրույցում Փաշինյանը և՛ ասում է՝ «Արցախը Հայաստան է և վերջ», և՛ նշում`«լուծումը պետք է բավարարի երեք կողմերին»․սա նշանակում է` այս հարցում չունի հստակ դիրքորոշում. քաղտեխնոլոգ

Պարզ է՝ վարչապետ Նիկոլ Փաշինյանը շատ լավ գիտեր, թե ինչ հաղորդման է մասնակցում, գիտեր թե՛ հաղորդման ֆորմատը, թե՛ հաղորդավարի վարելու ոճը, առավել ևս, որ որոշ ժամանակ առաջ ԱԳ նախարար Զոհրաբ Մնացականյանն էլ էր այդ ֆորմատին մասնակցել և բավականին մեծ աղմուկ բարձրացավ, լուրջ քննադատության թիրախ դարձավ նա: Այս մասին Tert.am-ի հետ զրույցում ասաց քաղտեխնոլոգ Վիգեն Հակոբյանը՝ անդրադառնալով BBC հեռուստաալիքի HARDtalk հայտնի հաղորդմանը վարչապետի տված հարցազրույցին, հաղորդավարի կողմից հնչեցված հարցերի որակին:

Նա նշեց, որ Նիկոլ Փաշինյանը փորձում էր հաղթող դուրս գալ այդ հարթակում, մանավանդ, եթե հարցազրույցը համեմատվելու էր Զոհրաբ Մնացականյանի հարցազրույցի հետ: «Այսինքն՝ իրեն սպարինգ էր պետք, ընդ որում՝ այդպիսի բարդ սպարինգ, որտեղ իսկապես ինքը կարող է հաղթող դուրս գալ, որովհետև Փաշինյանը հասկանում է՝ շատ վաղուց հասարակական ընկալման մեջ ինքը հաղթող դուրս չի եկել վերջին ամսիներին, մանավանդ հենց նույն կորոնավիրուսի համավարակի սկիզբ առնելուց հետո:

Պարզ է՝ մի կողմից՝ ֆորմատն է այդպիսին, հենց անունն էլ հուշում է՝ «ծանր խոսակցություն» և ընդհանրապես ոճն է այդպիսին այդ հաղորդման, որտեղ սուր հարցեր են տրվում, շատ դեպքերում՝ կոշտ հարցեր:

Մյուս կողմից՝ պետք է հաշվի առնել, որ BBC-ի մասին է խոսքը, իսկ BBC-ն Մեծ Բրիտանիան է, իսկ Մեծ Բրիտանիան միշտ էլ շահեր է, նավթ է, և ավանդույթ է, որ Կովկասում Մեծ Բրիտանիան սերտ կապեր ունի Ադրբեջանի հետ: Այդտեղ շահեր կան, այս տեսակետից որևէ անսպասելի բան չկար»,- նշեց նա:

Քախտեխնոլոգի խոսքով՝ Նիկոլ Փաշինյանը պատկերացում ուներ՝ ինչ հարցեր են տալու և նա փորձում էր մենամարտի մեջ մտնել. մի քանի անգամ իրեն փորձում էր հաղորդավարն ընդհատել, բայց նա խոսքը չէր ընդհատում, ասում էր՝ թողեք ավարտեմ խոսքս: «Նա ուզում էր դրականորեն տարբերվեր Զոհրաբ Մնացականյանից»,- կարծիք հայտնեց նա:

Ինչ վերաբերում է նրան՝ որքանո՞վ Փաշինյանի պատասխաններն աղերս ունեին իրականության հետ, Հակոբյանը նշեց, որ այս առումով ոչ մի անակնկալ չկար,  և որ Փաշինյանն իր սովորական ռեպերտուարի մեջ էր:

«Նույն կորոնավիրուսի մասին հարց հնչեցվեց․ «Ձեր ընդդիմադիրներն ասում են՝ տապալել եք կորոնավիրուսի դեմ պայքարը և համավարակի դեմ պայքարում եք լայվերով, սելֆիներով»:

Այստեղ նոր բան չկա, այս առումով, իհարկե, դժվար է վիճել հաղորդավարի հետ, Հայաստանում հենց այդպիսի կարծիք էլ կա: Ես էլ եմ այդպես ասում և ոչ միայն ես եմ ասում: Կա ձևավորված կարծիք, որ այսօրվա իշխանությունները կորանավիրուսի դեմ պայքարը տապալել են և այն դրական տենդենցը, որ մենք հիմա ունենք, սա արդեն բնությունը, կենսաբանական օրենքներն են աշխատում: Այսինքն՝ այնքան են շատացել դեպքերը, որ մոտեցել ենք համաճարակային շեմին, որից հետո ինքն իրենով նահանջում է»,- ասաց նա:

Դիտարկմանը՝ Փաշինյանն այդ մեղադրանքներին հակադարձեց, նշելով՝ Հայաստանը ժողովրդավար երկիր է և ընդդիմությունն ազատ է իր կարծիքն արտահայտել, ու հավելեց, որ ուրախ է, որ ընդդիմությունը կարողանում է գործել շատ ավելի ազատ, քան մինչ հեղափոխությունը, Վիգեն Հակոբյանն էլ իր հերթին հակադարձեց. «Չէի ասեի, որ Նիկոլ Փաշինյանը, որպես ընդդիմադիր, շատ էր կաշկանդված: Իհարկե, խոսքը չի վերաբերում բոլոր ժամանակաշրջաններին»:

Ըտ նրա՝ ժողովրդավարություն եզրույթը, Փաշինյանի և նրա իշխանության «սուրբ» կողմն է, որի մասին ցանկացած հարթակում խոսում են: 

«Ժողովդրավարություն» տերմինը, ըստ Նիկոլ Փաշինյանի, առնվազն պետք է տարբերի այսօրվա իշխանությունը նախորդ իշխանություններից և, իհարկե, իր համար բավական ցավագին է, զգայուն թեմա է, երբ որևէ մեկը, մանավանդ, արևմուտքից և դեմոկրատիայի օրրան համարվող երկրներից, կարող է հեղափոխական իշխանությանը մեղադրել, որ հիասթափություն կա, մանավանդ ժողովրդավարության առումով: Դրա համար էլ այս հաղորդմանն էլ ինքը մեջբերեց տարբեր ռեյտինգներ, տարբեր գործակալությունների, պարբերականների հրապարակումներ»,- ասաց  նա:

Դիտարկմանը՝ հարցազրույցի ընթացքում անդրադարձ եղավ նաև հայ-ադրբեջանական սահմանին տեղի ունեցած հուլիսյան դեպքերին, երբ Ադրբեջանը գնաց սադրանքի, վարչապետն էլ նշեց, որ Ադրբեջանը նախահարձակ է եղել և հավելեց, որ խաղաղությունը չի կարող լինել միայն ՀՀ կողմից միակողմանի գործողություններով, Հակոբյանն արձագանքեց. «Այս առումով հայկական կողմն ունի ձևավորված տեսակետ՝ Տավուշյան դեպքերի հետ կապված և այդ տեսակետը ներկայացվել է: Փաշինյանն այլ բան չէր կարող ասել, հնչեցրել է  պաշտոնական դիրքորոշումը»,- ասաց նա:

Ինչ վերաբերում է Փաշինյանի «Արցախը Հայաստան է և վերջ» հայտարարությանը, որի մասին հարցազրույցի ժամանակ Փաշինյանն ասաց, որ դա պատմականորեն է ապացուցված, և որին հաղորդավարն ասում էր՝ հիմա պատմական էքսկուրսի ժամանակը չէ, Հակոբյանն ասաց․«Փորձ էր արվում Հայաստանին ներկայացնել որպես օպուկանտ, որը տարածքներ է վերցրել և Ադրբեջանը փորձում է այդ հարցը լուծել, Նիկոլ Փաշինյանը իր տեսակետը հայտնեց իր հայտնի կոնցեպտով, որ Հայաստանը առաջարկել է նոր բանաձև՝ լուծումը պետք է բավարարի երեք կողմերին էլ:

Ընդհանուր առմամբ, որ ասում է՝ դա պատմական փաստ է, բնականաբար, դա իրոք պատմական փաստ է: Ամբողջ խնդիրն այն է, որ այս երկու տարվա ընթացքում Նիկոլ Փաշինյանը Արցախի հարցի շուրջ կոնցեպցիաներում իրար հակասող շատ բաներ է ասել: Հենց այդ նույն հարցազրույցում էլ, երբ դու մի կողմից ասում ես, որ «Արցախը Հայաստան է և վերջ» ու դա պատմական փաստ է, ապա ասում ես, որ «լուծումը պետք է բավարարի երեք կողմերին էլ», այդ երկու եզրույթը հակասում են իրար»,- նշեց նա:

Ըստ Հակոբյանի՝ հենց այս հակասությունների պատճառով է, որ բոլոր հարցազրույցներում ու քննարկումներում այս նույն հարցը ծագում է՝ ինչպե՞ս հասկանանք, որ դու մասնակցում ես բանակցություններին և ասում ես՝ երեք կողմերին էլ պետք է բավարարի խնդրի լուծումը և, միևնույն ժամանակ, ասում ես՝ մերն է և վերջ:

«Դրա համար վարչապետը միշտ այդ կազուսի առջև է կանգնում: Ես կարծում եմ՝ Արցախի հարցի շուրջ Հայստանի այսօրվա իշխանությունները, մասնավորապես վարչապետը չունի հստակ որոշում, այդ իսկ պատճառով այդ հարցի առաջ ինքն անընդհատ կանգնում է, այդ հարցն իրեն տալիս են և ինքը ստիպված է լինում պաշտպանվել»,- շեշտեց նա:

Tert.am