Նման հակահայկական ծրագիր շրջանառելու համար կրթության նախարարը պարտավոր է հրաժարական տալ, նրա բոլոր քայլերը տանում են դեպի կրթության անկում. գրականագետ

Երկու տարի է՝ իրենք աշխատում են հանրակրթության այս ծրագրի վրա և դրա դիմաց ստացել են վիթխարի գումարներ և հսկայական հոնորարներ: Այդ գումարը, որ նրանք վատնել են, պետք է հետ գանձեն, որ իմանան՝ պատիժ գոյություն ունի: Նրանք հիմա պետք է ստեղծած լինեին մի փաստաթուղթ, որը նախկինում գործող չափորոշչից ավելի լավը լիներ՝ ավելի հայամետ ու հայակենտրոն: Բայց իրենց ստեղծածը մի փաստաթուղթ է, որը ծայրից ծայր խոցելի է և պիտանի չէ, դա ոչ թե պետք է քննարկել և ուղղում անել, այլ արմատապես պետք է մերժել և դրա փոխարեն ստեղծել նորը։ Այս մասին Tert.am-ի հետ զրույցում նշեց գրականագետ Դավիթ Գասպարյանը:

Նշենք, որ ԿԳՄՍ նախարարությունը իր պաշտոնական էջում հրապարակել է և հանրային քննարկմանն է ներկայացրել հանրակրթության պետական առարկայական չափորոշիչների և օրինակելի ծրագրերի նախագիծը: Նախագծով գրականության դասագրքից հանվելու է նախկինում դասագրքում ներառված հայ հեղինակների գործերը, ավելացվելու են հայ և արտասահմանյան ժամանակակից գրողների ստեղծագործություններ:

«Հանրակրթության նախագիծը շրջանառության մեջ են դրել և անունը դրել նախագիծ, բայց քանի որ քննադատությունը խիստ է, տպավորություն են ստեղծում, որ շտկելու բաներ ունեն։ Դա թյուրիմացություն է: Բաց և թափանցիկ ձևով պետք է աշխատեին, ստեղծեին մասնագետների խումբ, որի մեջ ներգրավված կլինեին գրականության, լեզվի մասնագետներ և ուսուցիչներ: Նման հակահայկական ծրագիր շրջանառության մեջ դնելու համար կրթության նախարարը պարտավոր է հրաժարական տալ, նա իրավունք չունի ղեկավարելու այն գերատեսչությունը, որ կոչվում է կրթության նախարարություն: Նրա բոլոր քայլերը տանում են դեպի կրթության անկում, դեպի ազգային արժեքների տրորում, սկսած կրթության ազգային ինստիտուտը փակելուց, վերջացրած այլ բաներով»,- նշեց նա:

Գրականագետը նշում է, որ 7-12 դասարանների գրականության առարկայից հանվել են կարևոր հեղինակներ, ինչպիսիք են ՝Մ. Խորենացին, Ն. Շնորհալին, Ն. Քուչակը, Նարեկացին և դրա փոխարեն ներառված են ոչ այդքան հայտնի ժամանակակից հեղինակներ. «Հայ գրականությունը ամբողջովին դուրս են թողել՝ Խորենացի, Քուչակ Նարեկացի, իրենց թվում է, թե դա պատմագրություն է, եթե դա այդպես է, բա հսկա Մանուկ Աբեղյանը, որ 2 հատոր հայ հին և միջնադարյան գրականություն պատմություն գրեց Կորյունից, Խորենացուց սկսած մինչև Սայաթ-Նովա, ուրեմն հասկանում էր, որ դա գրականություն էր, հիմա այս մարդիկ Աբեղյանին են դե՞մ, թե հայ գրականությանը:

Ընդգրկված են ժամանակակից հեղինակներ, որոնք անուն չունեն, օրինակ՝ ընդգրկված է մի հեղինակի գործ, որ հերոսը կենակցում է առնետի հետ (Գուրգեն Խանջյանի «Առնետ» վեպը), հիմա երեխան դա՞ պետք է կարդա և սովորի, կամ Ֆրանց Կաֆկայի «Կերպարանափոխություն»-ը, դա հասուն ընթերցողի գործ է, դա երեխայի համար մատչելի և հոգեբանորեն ընկալելի չէ, այն հոգեբանական շեղումներ կարող է առաջացնել: Տասնյակ նոր անուններ, օտար հեղինակներ, որոնք իրենց չեն հաստատել ընթացիկ գրականության մեջ, հիմա պետք է մտնեն գրականության դասագի՞րք»։

Դավիթ Գասպարյանը, անդրադառնալով այն փոփոխությանը, ըստ որի, ավագ դպրոցում «Հայ գրականություն» առարկայից հանվել է «հայ» բառը, քանի որ դասագրքում ներառվելու են նաև այլ հեղինակներ, նա նշեց. «Եթե ավագ դպրոցում արտասահմանյան գրականություն են ուզում ներառել, այն պետք է առանձին դասագրքով ներկայացվի, որպես առանձին առարկա, ինչը շատ ճիշտ կլինի, սակայն դա պետք է անել ոչ հայ գրականության հաշվին: Մի արատավոր երևույթ ևս կա․ գրականության ցանկ են ներկայացրել, որ ամեն մի դպրոց ընտրի իր ուզածը, մի դպրոց ընտրում է այս հեղինակին, մյուսը՝ մեկ այլ հեղինակի, բայց երեխաները միասնական քննություն են տալու, ո՞նց են կողմնորոշվելու: Մի խնդիր ևս կա․ 5-6-րդ դասարաններում դասագիրքը կոչվում է մայրենի, դա սխալ է, պետք է լեզուն և գրականությունն առանձնացնեն և այդ դասարաններում արտասահմանյան և ժամանակից հեղինակների գործեր ներկայացվեն»,- նշեց նա:

Դավիթ Գասպարյանը նշեց, որ խնդրի վերաբերյալ պատրաստվում են մի խումբ գրականագետներով բաց նամակով հանդես գալ՝ պահանջելով ԿԳՄՍ նախարար Արայիկ Հարությունյանի հրաժարականը:

Tert.am