«Իմ քայլն» առաջարկել է ավելի բարձր գույքահարկերին անցնելու ժամկետը 4-ի փոխարեն սահմանել 6 տարի

Ազգային ժողովը երկրորդ ընթերցմամբ քննարկում է «Հայաստանի Հանրապետության հարկային օրենսգրքում փոփոխություններ և լրացումներ կատարելու մասին» ՀՀ օրենքի նախագիծը։ Նշենք, որ փոփոխություններով գույքահարկի բարձրացում է նախատեսվում:

Հիմնական զեկույցով հանդես եկավ ֆինանսների նախարարի տեղակալ Արման Պողոսյանը, ով նշեց, որ «Իմ քայլը» խմբակցությունը երկու փոփոխություն է առաջարկել, որին Կառավարությունը հավանություն է տվել:

«Առաջինը վերաբերում է նրան, որ համակարգի ներդրումն ավելի սահուն ապահովելու համար գույքային հարկերի գծով բեռի բարձրացումը աստիճանաբար իրականացնել ոչ թե 4 տարիների ընթացքում, ինչպես սկզբնապես առաջարկվել էր նախագծում, այլ վեց տարվա ընթացքում՝ հետևյալ համամասնությամբ՝

առաջին տարի՝ 2021 թվական՝ 25 տոկոս,
երկորրդ տարի՝ 30 տոկոս,
երրորդ տարի՝ 35 տոկոս,
4-րդ տարի՝ 50,
5-րդ տարի՝ 70 տոկոս, և վերջում 100 տոկոս:

Սրանով ըստ էության առաջարկվում է երկու տարի տևողությամբ այս համակարգի ներդրումն ապահովել: Կառավարության համար առաջարկն ընդունելի է, նախագիծը լրամշակվել է՝ ակնկալվող արդյունքները որոշակիրոն փոխվում են»,- ասաց նա:

Երկրորդ առաջարկը նրա համար է, որ համակարգի պրոգրեսիվությունն ընդգծվի: ««Տեսնելի հարստություն» կամ շքեղության չափորոշիչ համարվող գույքային միավորի համար առաջարկվում է ավելի բարձր հարկային բեռ: 200 մլն դրամ և ավելի հարկման բազա ունեցող բնակարանի և անհատական բնակելի տան համար, հարկման դրույքաչափը գերազանցման մասով լինի ոչ թե մեկ տոկոս, այլ 1.5 տոկոս: Թեև մեր կարծիքով համակարգը պրոգրեսիվ էր, բայց այս առաջարկը ևս ընդունվել է, և նախագիծը լրամշակվել է»,- ասաց նա:

Փոխնախարարը ընդգծեց՝ կարևոր է, որ մենք այս նախաձեռնությանը վերաբերվենք այն տրամաբանությամբ, որ այս փոփոխությունների շահառուն ՀՀ քաղաքացին է, նույն գույքային հարկ վճարող քաղաքացին: «Ինչո՞ւ, որովհետև եթե մենք հավակնում ենք ունենալ ավելի բարվոք համայնքային միջավայր, ավելի լավ համայնքային ծառայություններ՝ սկսած կանաչապատումից, վերջացրած ճանապարահաշինությամբ և այլն, մենք այլընտրանք չունենք, քան համայնքներին զինենք լրացուցիչ ռեսուրսներով, ունենանք իրապես տեղական ինքնակառավարում և լավ հանրային բարիքներ՝ հանրային մակարդակում»,- ասաց նա:

Պողոսյանը անդրադարձավ այն հարցադրմանը՝ արդյոք սա չի վտանգի ներդրումային միջավայրը: «Եթե խոսում ենք պարզապես անշարժ գույք գնելու և այդպես պահելու մասին, էստեղ մենք մտահոգություն չենք տեսնում, որովհետև արտահանման չկողմնորոշված ոլորտի հնարավոր զարգացումներով մտահոգվելը մեր առաջնահերթությունը չէ: Մենք պետք է մտածենք արտադրողական արտահանմանն ուղղված տնտեսություն ունենալու մասին:

Այս դեպում հռետորական հարց է ծագում, իսկ մենք այդ նույն սփյուռքահային, որը Երևանում պետք է գնի բնակարան, հարցրե՞լ ենք, ինքը պատրստ է գումար ծախսել, բնակարան գնել մի միջավայրում, որտեղ չկան նորմալ ենթակառուցվածքներ, ճանապարհներ, նորմալ լուսավորություն, աղբահանության նորմալ համակարգ, պատասխանը բոլորի համար պարզ է, դա լինելու է բացասական»- ասաց նա:

Ըստ փոխնախարարի՝ եթե կարևորում ենք վերջնաժամկետը գույքային հարկերի վճարման, ստացվում է, որ առաջին անգամ սեփականատարը այս ազդեցությունը փոքր չափով զգալու է 2,5 տարի հետո՝ 2022 թվականի դեկտեմբերի 31-ին: