Իսկ դուք ի՞նչ եք անում Արցախի համար, հարգելի՛ պաշտոնյաներ

«Հրապարակ»-ը գրում է․

«Բաղրամյան պողոտայում կարելի է տեսնել մեծ գովազդային վահանակ, որտեղ սփյուռքի նախարարությունը հարցնում է ՀՀ քաղաքացիներին. «Դու ի՞նչ ես անում Արցախի համար»։ Հետաքրքիր է՝ ի՞նչ են մտածել այս «գովազդը» պատրաստողները, ի՞նչ նպատակ են ունեցել նման հրամայական հարց-հաշվետվությամբ դիմողները։

Վերջին հաշվով՝ ո՞վ իրավունք ունի նման բան հարցնել։ Այս գովազդի տեղադրման համար վճարած գումարը թող նախարարությունն ուղղեր Արցախին, իսկ հայկական երկրորդ պետությանն օգնելու մղումն արտահայտեր իր աշխատանքում։

Կարծեմ՝ հենց շարքային քաղաքացիներն ու նրանց զավակներն են ծառայում Արցախում, միջին խավի ՀՀ քաղաքացին է հանգստի մեկնում Արցախ՝ մոնակոների և դուբայների փոխարեն, իսկ որևէ բարեգործական ակցիա կազմակերպելիս իր նվազագույն աշխատավարձից առաջինը հենց շարքային քաղաքացին է բաժին հանում Արցախին։ Վճարած հարկեր– տուրքերի մասին էլ չասած։ Այնպես որ ՝ այդ մենք պետք է հարցնենք ՝ իսկ դո՞ւք ինչ եք անում Արցախի համար, հարգելի պաշտոնյաներ»։

Մանրամասները՝ թերթի այսօրվա համարում։