Այս ընտրությունների ամենամեծ անակնկալը մասնակիցների սակավաթիվ լինելն էր (Տեսանյութ)

Եվ այսպես, ավարտվեցին ընտրությունները, արդյունքները այդքան էլ անսպասելի չէին: Փաշինյանի թիմը հավաքեց ձայների ավելի քան 70 տոկոսը: Ծառուկյանը, ինչպես միշտ, երկրորդն էր, իսկ երրորդը դարձավ... Լուսավոր Հայաստանը: Չնչին ձայներ չհերիքեցին ՀՀԿ- ին ապագա ԱԺ-ում լինելու համար:

Անշուշտ, Լուսավորի այսպիսի հաջողությունը և ՀՀԿ-ի նման պարտությունը վերլուծաբանները դեռ երկար կվերլուծեն, սակայն ամենաակնառուն այն էր, որ այս ընտրություններին մասնակցեցին ընտրողների ընդամենը... 48 տոկոսը: Եվ դա հեղափոխությունից ընդամենը... 7 ամիս անց:

Շատերը նշում են, որ այս ցուցանիշը նշելիս պետք է հաշվի առնել այն հանգամանքը, որ այս անգամ բացակայում էր ընտրակաշառքի գործոնը, ինչը ճիշտ է: Բայց ճիշտ է նաև այն, որ դա պետք է որ կոմպենսացվեր էյֆորիայի գործոնով: Իսկ վերը նշված ցուցանիշը ցույց է տալիս, որ հանրության մեծ մասի մոտ էյֆորիան վերացել է, և մարդիկ առավել սթափ են սկսել գնահատել ներակայիս իրավիճակը:

Սա նշանակում է նաև, որ Փաշինյանի թիմին աջակցել է հանրության այն մասը, որտեղ կամ մնացել է էյֆորիայի մթնոլորտը, կամ էլ կար վախ՝ ՀՀԿ-ի հնարավոր վերադարձի առումով:

Իսկ դա շատ վտանգավոր ցուցանիշ է մի ուժի համար, ով այսպիսի մեծ պաթոսով այս տարվա գարնանը նվաճեց իշխանությունը: Հիշեցնենք, որ այդ ժամանակ նա ուներ ողջ հանրության գրեթե բաձարձակ մեծամասնությունը:

Մինչդեռ այսօր Փաշինյանին աջակցող այդ զանգվածի ուղիղ կեսն է մնացել: Նույնիսկ այդ մնացած զանգվածի... 70 տոկոսը:

Պարզ է, որ այդ 70 տոկոսը ավանսով տված ձայներ են, և որի ժամկետը երկար չի տևելու, մանավանդ, որ գալիք պառլամենտում այլևս «մեշոկ պապին»՝ ի դեմս ՀՀԿ-ի, այլևս ներկայացված չի լինելու:

Պարզ է նաև այն, որ մարդիկ այդ ավանսը տվել են անձամբ Փաշինյանին, իսկ նրա թիմի 90 տոկոսին ոչ ոք չի ճանաչում: Այնպես որ, Փաշինյանի վարկանիշի հնարավոր անկումը, կարող է արժեզրկել նաև ողջ ԱԺ-ին՝ դրանից բխող բոլոր հետևանքներով:

Դեկտեմբերի 10 –ից հետո Փաշինյանը ունենալու է թե գործադիր, և թե օրենսդիր մարմնում գրեթե 100 տոկոսանոց աջակցություն, և այլևս «քավության նոխազի» դերում թեկնածուներ չեն լինելու՝ չլուծված խնդիրները իրենց վրա բարդելու համար:

Այնպես որ, հանրության 48 տոկոսից, 70 տոկոս աջակցություն ստացած Փաշինյանին սպասում է դժվար քննություն հանձնել արդեն ողջ ժողովրդի առջև, որից էլ կախված է լինելու թե իր, և թե մեր երկրի ապագան:

Արտակ Հակոբյան