Փորձում են կոնտեքստից հանել մի միտք և քննարկել.Սամվել Բաբայանի պաշտպանը գաղտնալսման բացահայտման միջնորդություն է ներկայացրել

Շենգավիթ վարչական շրջանի ընդհանուր իրավասության դատարանում այսօր մեկնարկել է Արցախի ՊԲ նախկին հրամանատար Սամվել Բաբայանի և մյուսների գործով դատական նիստը։

Հիշեցնենք, որ Վճռաբեկ դատարանը հունիսի 15-ին բեկանել էր Սամվել Բաբայանի և ընկերների վերաբերյալ վճիռն ու գործն ուղարկել առաջին ատյան` նոր քննության:
Ըստ մեղադրանքի` Սամվել Բաբայանը դրդել է մի խումբ անձանց` նախնական համաձայնությամբ, ապօրինի կերպով ռազմամթերք հանդիսացող «Իգլա» ձեռք բերելուն, փոխադրելուն և պահելուն, ինչպես նաև փոխարկման արդյունքում հանցավոր ճանապարհով ստացված գույք` գումար ձեռք բերելուն: Սամվել Բաբայանը դատարապարտվել էր 6 տարվա ազատազրկման:

Դատական այսօրվա նիստում Սամվել Բաբայանի պաշտպան Արամ Ղլեչյանը գաղտնալսման բացահայտման հետ կապված միջնորդություն ներկայացրեց, որ գաղտնալսումն ամբողջության տրամադրվի պաշտպանական կողմին:
Գաղտնալսումը նախկինում չէր տրամադրվել պաշտպանական կողմին, Վճռաբեկ դատարանը կայացրած վճռով պարտավորեցրել էր տրամադրել գաղտնալսումը:

«Մեղադրական կողմի դիրքորոշումը հետևյալ է` կոնտեքստից հանել մի միտք և փորձել դրա շուրջ քննարկում անել: Այս անգամ դա չի ստացվի: Եթե մենք դատարանում ենք, ապա գործր թող քննարկվի ամբողջ կոնտեքստով, փաստերով և ապացույցներով: Հարգելի դատավոր, ամբողջովին ծանոթանալով այդ գաղտնալսումներին, հնարավոր է, Դուք միանգամից կարճեք գործը»,- հայտարարեց Սամվել Բաբայանը:

Միջնորդությունը քննարկելու համար դատավոր հեռացավ խորհրդակցական սենյակ։ Նիստը հետաձգվեց, այն կշարունակվի նոյեմբերի 26-ին, ժամը 12։30-ին։

Ակաթի Վահանյան