Իրանի դեմ պարբերաբար կիրառվող ամերիկյան պատժամիջոցները մեր տնտեսության համար բացում են նոր հնարավորություններ

Բազմիցս նշել եմ, որ Իրանի դեմ պարբերաբար կիրառվող ամերիկյան պատժամիջոցները ոչ միայն ռիսկեր են առաջացնում մեր տնտեսության համար, այլ նաև բացում նոր հնարավորություններ։

Ընդամենը մի քանի օր առաջ նախագահ Դ․ Թրամփի վարչակարգի՝ Թեհրանի դեմ ուժի մեջ մտցրած պատժամիջոցներն արգելում են նաև Իրանում արտադրված պարսկական գորգերի ներմուծումը Միացյալ Նահանգներ։ Որպեսզի պատկերացում լինի, թե գումարային արտահայտությամբ ի՞նչ ծավալների առևտրի մասին է խոսքը, նշեմ, որ միայն 2016 և 2017թթ․ Իրանից ԱՄՆ են ներմուծվել համապատասխանաբար 56 և 97 միլիոն դոլարի պարսկական գորգեր։

Այս առումով, կարծում եմ՝ կարելի է քննարկել և դրական արդյունքների դեպքում արագորեն իրականացնել, դիցուք, Մեղրիի ազատ տնտեսական գոտում պարսկական գորգերի հայ-իրանական համատեղ արտադրության կազմակերպումը, որը միտված կլինի բավարարելու հենց ԱՄՆ շուկայի պահանջարկը, քանի որ Հայաստանի արտադրանքը կարող է ազատորեն վաճառվել ցանկացած երկրում։

Իրանագետ Վարդան Ոսկանյանի ֆեյսբուքյան էջից։