Արեգնազ Մանուկյանին երեխայի հետ շփումից զրկելը խոշտանգման էլեմենտ է պարունակում․ Սողոյան

Արեգնազ Մանուկյանի նկատմամբ կիրառված կալանավորումը կրում է պատժիչ ու ռեպրեսիվ բնույթ: «Աբովան Time»-ի եթերում ասում է փաստաբան Տաթևիկ Սողոյանը։

«Արեգնազ Մանուկյանին մեղսագրվող արարքը միջին ծանրության հանցանք է: Ոչ ծանր է, ոչ առանձնապես ծանր։ Պետք է իմանանք, որ առհասարակ մեր իրավական պրակտիկայում միջին ծանրության հանցանքների համար նույնիսկ տղամարդկանց չեն կալանավորում»,- նշում է փաստաբանը:

Ըստ պաշտպանի՝ դատարանը չի հաստատել խափանման միջոցի երեք հիմնական ռիսկերից երկուսը՝ փախուստի դիմելու կամ նոր գաղտնիք փոխանցելու հավանականությունը. «Այլ ասել է, որ կարող է ինչ-որ մի ձևով խոչընդոտի վարույթի ընթացքին: Այսինքն՝ մեկ հիմքով, ենթադրյալ հիմքով, ենթադրյալ կատարված հանցագործությամբ, որ երևի թե Արեգնազ Մանուկյանն է այդ տեղեկատվությունը փոխացնել, անվերջ «երևի»-ների համար այս մարդուն հիմա արգելել են շփվել իր 13-ամյա դստեր հետ»:

Ըստ Սողոյանի՝ այս ամենն ունի քաղաքական ենթատեքստ և նպատակ ունի հոգեբանական հարված հասցնել ընդդիմադիր գործիչներին. «Երբ Լիդիա Մանթաշյանն էր կալանքի տակ գտնվում, ես ասում էի, որ արդեն այս դուռը բացվել է։ Լիդիան ինքն իր դերակատարությամբ Սրբազան պայքարի մեջ, այսպես ասեմ, քաղաքականապես այն դերակատարը չի եղել, նա եղել է այն դերակատարը, որի միջոցով արդեն այդ դուռը բացել են, որ այսուհետ չեն ճանաչելու կին է,թե տղամարդ։ Եվ նաև այն կերպարն է եղել, ում միջոցով նաև ավելի, այսպես ասած, ցավացրել են, օրինակ՝ Բագրատ սրբազանին։ Հիմա նույնն էլ Արեգնազ Մանուկյանինն է, որ նաև Անդրանիկ Թևանյանին են փորձում այդպիսով ավելի ցավեցնել՝ իր վրա դնելով պայմանական ասած այն բեռը, որ ոչ միայն դու ես հիմա կալանավորված, այլ նաև այս կինը: Իրավական տրամաբանությունը վաղուց սպառված է»:
Փաստաբանը հայտնել է, որ մոտակա օրերին սահմանված ընթացակարգով կներկայացվի վերաքննիչ բողոք, թեև Մանուկյանն այդ դատարանից մեծ հույսեր չունի: Ինչ վերաբերում է Եվրոպական դատարան դիմելուն, ապա գործի՝ պետական գաղտնիքին առնչվելու պատճառով հնարավոր են որոշակի սահմանափակումներ, ինչն այժմ քննարկվում է գործընկերների հետ:

Ավելի մանրամասն՝ տեսանյութում։