«Դաժան անմարդկային վերաբերմունք, հոգեբանական խոշտանգում». իրավապաշտպանը՝ Արեգնազ Մանուկյանի կալանավորման մասին

Իրավապաշտպան Ժաննա Ալեքսանյանը ֆեյսբուքյան էջում մեջբերում է արել քաղբանտարկյալ, «Մայր Հայաստան» վարչության անդամ Արեգնազ Մանուկյանի՝ բանտից հղած ուղերձից. «Ես այսօր բացարձակապես մեկուսացված եմ աշխարհից և զրկված եմ նույնիսկ 13-ամյա դստերս ու 85-ամյա մորս հետ հեռախոսով խոսելու հնարավորությունից»: 
Այնուհետև իրավապաշտպանը գրում է. «Դաժան անմարդկային վերաբերմունք, հոգեբանական խոշտանգում, չհաստատված, միջին ծանրության մեղադրանքի դեպքում՝ և փաստաբանի պնդմամբ՝ ենթադրության հիմքով։ Իրոք որ ցնցող է և անպատկերացնելի։ Լավ, բա 13 տարեկան երեխային ինչու եք պատժում։
Հենց այս պատժիչ մեթոդների կիրառումն է ցույց տալիս մեղադրանքի խոցելիությունը։Եթե մեղադրանքը չհաստատվի, գոնե հոգեպես բավարարված կլինեն, որ պատժել են ընդդիմադիր կնոջը՝ ամենասադիստական մեթոդներով։
Գլխավոր դատախազուհին վերջերս հայտարարում էր, որ հարցումները ցույց են տալիս դատախազության նկատմամբ հանրային վստահությունը աճել է։ Սա ոգևորում է դատախազությանը։
Եվ հիմա, այս դեպքով, դատախազությունն առաջնորդվում է հր վկայակոչած հանրային վստահությամբ։ Արեգնազ Մանուկյանի, նրա անչափահաս երեխայի հետ նման վարվելակերպով պատժում են նաև հանրության այն մասին, որն անընդունելի, մերժելի, անբարո է համարում նման գործելակերպը»։