Հայ մարդկանց վրա հարձակվելու փաստերով փաշինյանական ռեժիմին սպասարկող «իրավապահները» ոչ մի առերևույթ հանցագործի չեն ձերբակալել

Հունիսի 2–ին, Արթոիկում ՔՊ-ականների կողմից ծեծի ենթարկված քաղաքացին արթիկցի Հակոբ Հարությունյանն է, ով այս տարվա մարտի 7–ին Նիկոլ Փաշինյանի Արթիկ կատարած այցի ժամանակ սուր հարցադրումներ է ուղղել Փաշինյանին։

NEWS.am-ը դեռ այդ ժամանակ ներկայացրել է այդ զրույցը վարչապետի հետ։ Հակոբ Հարությունյանը՝ դիմելով Փաշինյանին, ասել է. «Դուք կարո՞ղ եք երաշխավորել, որ Ադրբեջանը կամ Թուրքիան հակամարտություն չեն սկսի։ Դուք ընդունո՞ւմ եք, որ Արցախը հայկական տարածք է եղել։

Հայաստանում գոյություն ունի նախագահ, վարչապետ և գոյություն ունի ամենայն հայոց կաթողիկոս։ Կաթողիկոսը ավելի բարձր է, քան վարչապետը։ Վարչապետը ղեկավարում է 3 մլն մարդու, իսկ Ամենայն հայոց կաթողիկոսը բոլոր հայերինն է։ Սահմանադրություն կա՞ օրենք, որ կարող ենք կաթողիկոս կարգել, չէ՞ որ ինքը նախարար չի, որ հանենք ու դնենք»։

Ի պատասխան Նիկոլ Փաշինյանն ասաց. «Հայաստանում կաթողիկոս կլինի, թե ով կլինի, չի կարող Հայաստանի Հանրապետության դեմ գործել։ Հայաստանի Հանրապետությունում պետությունից բարձր ոչ մի բան չի կարա լինի։

Կաթողիկոս չկա, Կտրիճ Ներսիսյանը կաթողիկոս չի, քեզ համար կաթողիկոս է, ինձ համար՝ ոչ։ Դուք կարող եք ներկայացնել միայն ձեզ, ես ներկայացնում եմ Հայաստանի Հանրապետությունը։ Ես եմ 100 հազարավոր հայ ժողովրդի ներկայացուցիչը, որովհետև իրենք քվեարկել են իմ օգտին»։

Քաղաքացին էլ պատասխանել է. «Կարող է ձեզ համար կաթողիկոս չկա, բայց հայ ազգի համար կա։ Բոլորս պետք է հարգենք մեր կաթողիկոսին, դա մեր օրենքն է։ Խնդրում եմ ձեզ, որպես վարչապետ, եղեք այնքան լեգիտիմ, որ կարողանաք հարգել մեր կաթողիկոսին»։

Նրա խոսքը դժգոհություն էր առաջացրել ներկաների մի մասի մոտ, ինչի արդյունքում իրավիճակը լարվել էր և նրանց միջև լեզվակռիվ էր սկսվել։

Նշենք, որ ըստ Makaryannews-ի, Հակոբ Հարությունյանին ծեծողներից մեկը ՔՊ ցուցակով պատգամավորի թեկնածու Ժաննա Ասատրյանի որդին է՝ Սիփան Գրիգորյանը, որն իր ընկերների հետ հարձակվել ու դաժանաբար ծեծել է քաղաքացուն։