Պեկինն առանձնահատուկ շքեղ ընդունելություն է կազմակերպել Թրամփի համար

ԱՄՆ նախագահ Դոնալդ Թրամփը ժամանել է Պեկին՝ Չինաստանի ղեկավար Սի Ցզինփինի հետ երկար սպասված բանակցություններ վարելու համար։ AP գործակալության փոխանցմամբ՝ օրակարգի առանցքային թեմաներն են լինելու Իրանի հետ պատերազմը, առևտրային հարցերն ու Թայվանին ամերիկյան զենքի վաճառքը։

Հանդիպման հիմնական մասը կմեկնարկի հինգշաբթի օրը. նախատեսված են երկկողմ բանակցություններ, այց Երկնքի տաճար և հանդիսավոր ընդունելություն։ Այդուհանդերձ, չինական կողմն ընդգծված շքեղությամբ է դիմավորել Թրամփին՝ «Թիվ 1 բորտի» վայրէջքից անմիջապես հետո նրա առջև բառացիորեն կարմիր գորգ են փռել։

Նախագահին դիմավորել են բարձրաստիճան պաշտոնյաները՝ ԿՀԱՊ-ի փոխնախագահ Հան Ցժենը, ԱՄՆ-ում Չինաստանի դեսպան Սե Ֆենը, արտաքին գործերի նախարարի առաջին տեղակալ Մա Ծյաոսյուն, ինչպես նաև Պեկինում ԱՄՆ հատուկ բանագնաց Դեյվիդ Փերդյուն։ Արարողությունն ուղեկցվել է պատվո պահակախմբով և զինվորական նվագախմբով։

«Մենք երկու գերտերություն ենք, — լրագրողներին ասել է Թրամփը Սպիտակ տնից մեկնելուց առաջ։ — Մենք Երկրի վրա ռազմական առումով ամենահզոր երկիրն ենք։ Չինաստանը համարվում է երկրորդը»։

Տնտեսություն և էներգետիկ ճգնաժամ

Չնայած ուժի այս ցուցադրությանը՝ այցը տեղի է ունենում Թրամփի վարչակազմի համար բավականին զգայուն պահի։ ԱՄՆ-ի և Իսրայելի՝ Իրանի դեմ պատերազմին մասնակցելու, ինչպես նաև դրանով պայմանավորված գնաճի պատճառով նախագահի վարկանիշը երկրի ներսում անկում է ապրում։ Հանրապետական գործիչն ցանկանում է «հաղթանակ» տանել՝ Չինաստանում սոյայի, տավարի մսի և ավիացիոն տեխնիկայի արտահանման նոր գործարքների տեսքով։

Հիմնական տնտեսական նախաձեռնությունները՝

• Առևտրի խորհուրդ․ Թրամփի վարչակազմը հույս ունի համատեղ խորհուրդ ստեղծել՝ տարաձայնությունները կարգավորելու և նոր առևտրային պատերազմը կանխելու համար։

• Էներգետիկ անվտանգություն. Պատերազմի հետևանքով Հորմուզի նեղուցը փաստացի փակվել է, ինչը հանգեցրել է էներգակիրների գների կտրուկ աճի։ Չնայած անցյալ շաբաթ Իրանի արտգործնախարար Աբբաս Արաղչիի Պեկին կատարած այցին՝ Թրամփը հայտարարել է, որ Իրանը գտնվում է «լիակատար վերահսկողության տակ», և իրավիճակը հարթելու համար իրեն պետք չէ Սի Ծինփինի օգնությունը։

Թայվանի հարցը․ «Առաջին կարմիր գիծը»

Թայվանի կարգավիճակը կլինի օրակարգի ամենասուր թեմաներից մեկը։ Չինաստանն իր խիստ դժգոհությունն է հայտնում կղզուն 11 միլիարդ դոլարի սպառազինություն վաճառելու ԱՄՆ-ի ծրագրերի վերաբերյալ։

Իրավիճակն ավելի է բարդանում Թայվանի՝ որպես կիսահաղորդիչների արտադրության համաշխարհային առաջատարի դերով, ինչն անհրաժեշտ է արհեստական բանականության զարգացման համար։ Այս տարի Թայվանից ԱՄՆ ներմուծման ծավալներն առաջին անգամ գերազանցել են Չինաստանից կատարվող ներմուծմանը։ Չինաստանի կոմունիստական կուսակցության պաշտոնաթերթ «Ժենմին ժիբաո»-ն իր խմբագրական հոդվածում Թայվանն անվանել է «առաջին կարմիր գիծը, որը չի կարելի հատել» և երկու երկրների հարաբերությունների «գլխավոր ռիսկային կետը»։

Բիզնես-դիվանագիտություն և միջուկային օրակարգ

Թրամփին ուղեկցում է ընտանիքի անդամներից և բիզնես հսկաներից բաղկացած պատվիրակությունը, այդ թվում՝ Ջենսեն Հուանգը (Nvidia) և Իլոն Մասքը (Tesla, SpaceX)։ Իր սոցիալական ցանցերում նախագահը նշել է, որ Սի Ծինփինին ուղղված իր «առաջին խնդրանքը» կլինի Չինաստանն ամերիկյան ընկերությունների համար «բացելու» կոչը։

Ռազմավարական նպատակները՝

1. Եռակողմ միջուկային համաձայնագիր. Թրամփը մտադիր է միջուկային զինանոցների սահմանափակման վերաբերյալ նոր դաշինք առաջարկել (ԱՄՆ-ի, Չինաստանի և Ռուսաստանի մասնակցությամբ)։ Ռազմավարական հարձակողական սպառազինությունների կրճատման պայմանագրի (ՍՆՎ-III) ժամկետն ավարտվել է փետրվարին, և այժմ Վաշինգտոնը ձգտում է Չինաստանին ևս ներգրավել վերահսկողության նոր համակարգում՝ հաշվի առնելով, որ Պեկինի միջուկային զինանոցն արդեն գերազանցել է 600 մարտագլխիկը։

2. Պատժամիջոցների մեղմացում․ Չինաստանն, իր հերթին, շահագրգռված է չիպերի նկատմամբ տեխնոլոգիական սահմանափակումների վերացմամբ և մաքսատուրքերի նվազեցմամբ։

Ռազմավարական և միջազգային հետազոտությունների կենտրոնի (CSIS) փորձագետների կարծիքով՝ Չինաստանն այս բանակցություններին մասնակցում է «զգալիորեն ավելի ամուր դիրքերից»։ Եթե հանդիպումն անցնի առանց բացահայտ բախումների, Պեկինը փաստացի շահող դուրս կգա, նույնիսկ եթե չհասնի մաքսատուրքերի անհապաղ վերացմանը։
Աղբյուր՝ News.am