Հայաստանի նոր նախագահի հետ համագործակցելու մասին խոսել է Զախարովան

ՌԴ ԱԳՆ պաշտոնական ներկայացուցիչ Մարիա Զախարովան ավանդական ճեպազրույցի ընթացքում պատասխանել է Հայաստանի Հանրապետության նոր նախագահի հետ հարաբերություններ կառուցելու մասին հարցին:

«Ես կարծում եմ, որ համապատասխան հայտարարություններ անելը միանշանակ նախագահի աշխատակազմի լիազորությունն է: Հայաստանի հետ մեր հարաբերությունները կրում են պատմական բնույթ, իսկ դրանց վեկտորն ամրագրված է երկկողմ փաստաթղթերում»,- ասել է Զախարովան:

Նրա խոսքով՝ հարաբերությունների զարգացումը կլինի երկկողմ համաձայնագրերով և բազմաթիվ գագաթաժողովների, հանդիպումների ու բանակցությունների ընթացքում ամրագրվածին համապատասխան` ելնելով նախևառաջ երկու երկրների ժողովուրդների բարեկեցության և շահերի սկզբունքներից:

Մարիա Զախարովան նաեւ չի պատասխանել այն հարցին, թե ինչպես է Ռուսաստանը վերաբերում Ստեփանակերտի՝ բանակցությունների սեղան վերադառնալու հարցին: «Մեր դիրքորոշումը Լեռնային Ղարաբաղի հարցում լավ հայտնի է, այն փոփոխության չի ենթարկվել»,- ասել է Զախարովան՝ ի պատասխան լրագրողի՝ վերը նշված հարցին:

Զախարովան նշել է, որ այդ դիրքորոշումն ամրագրված է համապատասխան փաստաթղթերում, և եթե ինչ-որ փոփոխություններ լինեն, իրենք այդ մասին անպայման տեղյակ կպահեն:

Zham.am