Հայաստանը Ուկրաինայի հարցում Ռուսաստանի դաշնակիցը չէ․ Փաշինյան

Նիկոլ Փաշինյանը կառավարության ճեպազրույցի ժամանակ հայտարարել է, որ Հայաստանը Ուկրաինայի հարցում Ռուսաստանի դաշնակից չէ՝ անդրադառնալով Ուկրաինայի նախագահ Վոլոդիմիր Զելենսկիի Երևան այցի վերաբերյալ հնչող քննադատություններին։

Վարչապետի խոսքով՝ Հայաստանը Ուկրաինային տրամադրել է հումանիտար օգնություն, և պաշտոնապես հստակեցրել է իր դիրքորոշումը․ «Ուկրաինայի հարցով մենք դաշնակից չենք Ռուսաստանի հետ»,- ընդգծել է Փաշինյանը։

Նա նաև նշել է, որ Հայաստանի արտաքին քաղաքականության և տարածաշրջանային խաղաղության գործընթացների համար առանցքային նշանակություն ունի Ալմա-Աթայի հռչակագիրը, որի վրա, ըստ նրա, կառուցվում է նաև Ադրբեջանի հետ խաղաղության օրակարգը։

«Դուք գիտեք, թե Ալմա-Աթայի հռչակագիրն ինչ կարևոր և սկզբունքային նշանակություն ունի մեզ համար, և մենք հենվում ենք այդ հռչակագրի վրա ու այդ հիմքի վրա ենք կառուցում խաղաղությունը Ադրբեջանի հետ։ Սա մեր սկզբունքային դիրքորոշումն է»,- ասել է վարչապետը։

Հիշեցնենք, որ Ուկրաինայի նախագահ Վոլոդիմիր Զելենսկին Երևան էր այցելել մայիսի 4-ին՝ մասնակցելու Եվրոպական քաղաքական համայնքի 8-րդ գագաթնաժողովին։

Աղբյուր՝ Armlur.am