Ովքե՞ր են ազատվելու իրենց ծառայողական պարտականությունների կատարումից. ԿԸՀ

Հանրային ծառայության մեջ գտնվող պատգամավորի թեկնածուները նախընտրական քարոզչության պաշտոնական մեկնարկի օրվանից մինչ քվեարկության օրն օրենքի ուժով ազատվում են իրենց ծառայողական պարտականությունների կատարումից։ Այս մասին  հայտնում են ՀՀ ԿԸՀ-ից։

Չնայած այդ հանգամանքին կան նաև բացառություններ, որոնց թվում են Հանրապետության նախագահը, վարչապետը, փոխվարչապետը, նախարարները, ԱԺ պատգամավորները։

Նշենք, որ քարոզչությունը սկսվելու է մայիսի 8-ից մինչև հունիսի 5-ի 24։00-ն։ Քարոզչությունն արգելվելու է հունիսի 6-ին և 7-ին։

ՀՀ ընտրական օրենսգրքի 19-րդ հոդվածի 5-րդ կետի համաձայն՝ արգելվում է նախընտրական քարոզչություն կատարել և ցանկացած բնույթի քարոզչական նյութ տարածել` պետական և տեղական ինքնակառավարման մարմիններին, ինչպես նաև պետական և համայնքային ծառայողներին (բացառությամբ Ազգային ժողովի պատգամավորների), ուսումնական հաստատությունների մանկավարժական կազմի աշխատողներին` իրենց լիազորություններն իրականացնելիս, դատավորներին, դատախազներին, քննչական կոմիտեի, հատուկ քննչական ծառայության ծառայողներին, ոստիկանությունում, ազգային անվտանգության, քրեակատարողական, դատական ակտերի հարկադիր կատարումն ապահովող ծառայություններում ծառայողներին, զինծառայողներին, ընտրական հանձնաժողովների անդամներին։