Արցախահայերին և ՀՀ-ին սատարող բանաձևի պատճառով Բաքուն խզեց կապերը ԵԽ-ի հետ

«Հրապարակը» գրում է. «Միլի Մեջլիսը (խորհրդարանը) այսօր՝ մայիսի 1-ին, բանաձև է ընդունել Եվրախորհրդարանի կողմից Ադրբեջանի դեմ, իբր, ձեռնարկված «կանխակալ գործողությունների վերաբերյալ»։ Այս մասին հայտնում են ադրբեջանական ԶԼՄ-ները։

Փաստաթուղթը կարդացել է փոխխոսնակ Զիյաֆաթ Ասկերովը։

Ըստ որոշման՝ Միլի Մեջլիսը (խորհրդարանը) դադարեցնում է Եվրախորհրդարանի հետ ցանկացած համագործակցություն։

Ավելին, կսկսվի Միլի Մեջլիսի անդամակցությունը «Եվրոնեսթ» խորհրդարանական վեհաժողովում դադարեցնելու ընթացակարգը։

Միլլի Մեջլիսի խոսնակ Սահիբա Գաֆարովան հայտարարել է, որ Ադրբեջանի խորհրդարանը ստիպված է եղել կասեցնել հարաբերությունները Եվրախորհրդարանի հետ, իր բնորոշմամբ, ԵԽ-ի «կողմնակալ փաստաթղթերի պատճառով, սակայն իր ջանքերի շնորհիվ 2016 թվականի սեպտեմբերին որոշում է կայացվել վերականգնել հարաբերությունները»։

«Ցավոք, վերջին 10 տարիները ցույց են տվել, որ Եվրախորհրդարանը մտադիր չէ հրաժարվել Ադրբեջանի դեմ իր կողմնակալ գործունեությունից։ Մեր տարածքային ամբողջականության վերականգնումը միայն մեծացրել է նրա գործունեությունը այս ուղղությամբ։ Այս ամենը ցույց է տալիս, թե ինչ չափանիշներով է իրականում գործում այս մարմինը», - նշել է խոսնակը։

Բաքվի հիստերիայի պատճառն, ըստ ամենայնի, ԵԽ երեկվա բանաձևն է, որը վերաբերում է Հայաստանի ժողովրդավարականության մարտահրավերներին և խնդիրներին, ինչպես նաև ներառում է հետևյալ պահանջները․

* Արդարություն և պատասխանատվություն հայ գերիների հարցում․ Եվրոպական Խորհրդարանը դատապարտում է Ադրբեջանի կողմից հայ ռազմագերիների և պատանդների անօրինական կալանավորումը՝ պահանջելով նրանց անհապաղ և անվերապահ ազատ արձակումը։ Այն ընդգծում է, որ ցանկացած կայուն խաղաղություն պետք է հիմնված լինի Հայաստանի ինքնիշխանության և տարածքային ամբողջականության նկատմամբ հարգանքի վրա։

* Արցախահայության իրավունքներ․ Եվրոպական խորհրդարանը վերահաստատում է իր հաստատուն աջակցությունը արցախահայության իրավունքներին, ներառյալ նրանց ինքնության և սեփականության պաշտպանության հարցերը։ Խորհրդարանը հստակ կոչ է անում ապահովել նրանց անվտանգ, անխոչընդոտ և արժանապատիվ վերադարձի իրավունքը՝ միջազգային երաշխիքների ներքո։ Պահանջում է պատասխանատվություն հայկական մշակութային և կրոնական ժառանգության ոչնչացման համար և կոչ է անում իրականացնել միջազգային գնահատման առաքելություն։

Ավելի վաղ, այսօր Բաքվում ԵՄ դեսպան Մարիանա Կույունչիչը կանչվել է Ադրբեջանի ԱԳՆ։

Այս դեպքում էլ դժգոհության պատճառը ապրիլի 30-ին Եվրախորհրդարանի կողմից ընդունված վերոնշյալ բանաձևն է, որը, ըստ ադրբեջանական կողմի, պարունակում է «անհիմն և կողմնակալ դրույթներ Ադրբեջանի դեմ»։ Դեսպանին բողոքի նոտա է հանձնվել։

Ադրբեջանի արտաքին գործերի նախարարությունը Կույունչիչին հայտնել է, որ Լեռնային Ղարաբաղի հայերը, իբր, «կամավոր են լքել տարածաշրջանը»։

Բաքուն հայտարարել է, որ Եվրախորհրդարանի այս մոտեցումը բացասաբար է անդրադառնում տարածաշրջանում կարգավորման գործընթացի և Ադրբեջանի ու ԵՄ-ի միջև հարաբերությունների հեռանկարների վրա։

Սա երիցս վկայում է այն մասին, որ Ալիևյան հայատյաց, բռնապետական և ցեղասպան ռեժիմն իրականում ոչ մի համակեցություն ու խաղաղություն էլ չի ցանկանում Հայաստանի ու հայերի հետ՝ որքան էլ այդ մասին համոզեն, երդվեն, պնդեն նրանց հայաստանյան խամաճիկ դաշնակիցները։

Արդարությունից, արդար խաղաղությունից խուսափելու համար, սակայն, Եվրոպան պետք է ավելի հեռուն գնա և ավելի մեծ ճնշում գործադրի Ադրբեջանի իշխանությունների վրա․ դրա առիթն էլ կա՝ մայիսի 4-5-ը Երևանում նախանշված Եվրոպական քաղաքական համայնքի գագաթնաժողովն ու ՀՀ-ԵՄ առաջին գագաթնաժողովը։

Անկախ նրանից, Ալիևն ու Էրդողանը կընդունեն Փաշինյանի հրավերը և կմասնակցեն այդ միջոցառմանը, թե ոչ՝ ճշմարտության ձայնն ավելի բարձր ու վճռական պիտի հնչի, հատկապես՝ միացյալ Եվրոպան և հավաքական Արևմուտքը սեփական հեղինակության բարձրացման խնդիր ունեն նույն՝ արցախահայության նկատմամբ իրենց հանցավոր անտարբերության և այս դեպքում այո՝ կանխակալ քաղաքականության պատճառով։

Կարևոր հավելում․ ԵԽ բանաձևը կարևոր ազդակ է Երևանում ԵՔՀ գագաթնաժողովի նախաշեմին․ հայաստանյան ընդդիմադիրների և միջազգային հայտնի իրավապաշտպանների կոչերը կարծես տեղ են հասնում, սպասենք․․․»: