«Խեղճ լինի» Սամվել Ալեքսանյանը. Փաշինյանի տված 750 հազար դոլարի մաքսատուրքից ազատվելու արտոնությանն էր կարոտ մնացել

Կառավարությունն ապրիլի 30–ի նիստում, ինչպես հաղորդում է News.am-ը, գերակա ոլորտում իրականացվող ներդրումային ծրագրի շրջանակներում ներմուծման մաքսատուրքից ազատեց հայտնի գործարար Սամվել Ալեքսանյանի ընտանիքին պատկանող «ՄԻԹ ՖՈՒԴ» սահմանափակ պատասխանատվությամբ ընկերությունը, որի կողմից ներմուծվող հումքը նախատեսվում է օգտագործել մսամթերքի արտադրության համար։ Արտադրությունն իրականացվելու է Երևան քաղաքում։ Ընկերությունը հիմնադրվել է 2018 թվականին։

Ծրագրի շրջանակներում նախատեսվում է իրականացնել 1․6 մլրդ դրամի ներդրում հումքի ձեռքբերման համար։

Ներկայումս առկա է 135 աշխատատեղ՝ 264 հազ դրամ միջին ամսական աշխատավարձով։ Ներդրումային ծրագրի շրջանակներում, մինչև 2027 թվականը ընկած ժամանակահատվածում, նախատեսվում է աշխատատեղերի թվաքանակը հասցնել մինչև 155-ի՝ 315 հազ դրամ միջին ամսական աշխատավարձով։

Արտոնություն ստանալու համար ներկայացված ապրանքների արժեքը կազմում է 1․6 մլրդ դրամ: Մաքսատուրքից ազատման արտոնությունը գնահատվում է 270 մլն դրամ։

Ալեքսանյանը պատրաստվում է Հնդկաստանից 350 հազար կիլոգրամ գոմեշի միս ներկրել, ինչպես նաև 900 հազար կգ խոզի ճարպ՝ Իտալիայից և 300 հազար կգ հավի կրծքամիս Չինաստանից, որն արտադրված է ԱՄՆ-ում։

Նշենք, որ «Միթ Ֆուդ» ՍՊԸ-ն զբաղվում է երշիկեղենի, նրբերշիկների, դելիկատեսային մսամթերքի, ինչպես նաև ավանդական հայկական բաստուրմայի և սուջուխի արտադրությամբ։
--
Հավելենք ու հիշեցնենք, որ Սամվել Ալեքսանյանը այն գործարարն է, ում անունը գրեթե ամենօրյա ռեժիմով հայտնվում էր Փաշինյանի ընտանեկան «Հայկական ժամանակ»-ում, հատկապես՝ 2010-2018 թվականներին, բացառապես բացասական շեշտադրումներով, այդ թվում՝ շաքարավազի և այլ արտոնությունների վերաբերյալ: 
Բայց Սամվել Ալեքսանյանը հիմա Փաշինյանի իշխանության «օլիգարխն» է, հետևաբար, հիմա էլ Փաշինյանն է նրան պատկանող բիզնեսներին արտոնություններ տալիս՝ այլ գործարարների դնելով անհավասար մրցակցային պայմաններում: «Խեղճ լինի» Սամվել Ալեքսանյանը. սուպերմարկետների, ֆաբրիկաների, առևտրի և սպասարկման այլ բիզնեսների տերը, եթե հիմնվենք կառավարության որոշման վրա, մի 750 հազար դոլար չունի՝ Հայաստանին մաքսատուրք վճարելու համար, Փաշինյանի տված արտոնությանն է կարոտ մնացել: Տեսեք-տեսեք, 2 տարվա մեջ 20 հատ նոր աշխատատեղ է ստեղծելու... 
Դե, այս արտոնությունները, իհարկե, ոչ մի կերպ կոռուպցիոն ռիսկով չեն: Չէ՞ որ Փաշինյանը ասել է, որ՝ «կոռուպցիա չկա»:
Մանավանդ, ընտրությունների նախօրեին... սա «բիրիքով» ձայներ «առնելու» տպավորություն է թողնում: Ենթադրաբար՝ Ալեքսանյանը իրենից կախում ունեցողներին պարտադրելու է Փաշինյանին «ձայն տալ», Փաշինյանն էլ Ալեքսանյանին դրա դիմաց 270 միլիոն դրամի արտոնությո՞ւն է տալիս: Իսկ ի՞նչ վատ վարկած է: