Պուտին. Այսօր մենք գլուխ ենք խոնարհում Հայոց ցեղաuպանnւթյան հարյուր հազարավոր զոհերի հիշատակի առջև

Ռուսաստանի նախագահ Վլադիմիր Պուտինը ուղերձ է հղել Հայոց ցեղասպանության 111-րդ տարելիցի կապակցությամբ՝ նշելով, որ ազգային պատկանելիության հողի վրա մարդկանց զանգվածային ոչնչացման և տեղահանման քաղաքականությունը չի կարող արդարացվել, և միջազգային հանրությունը պետք է միավորի ուժերը ապահովելու, որ նման բարբարոսությունը երբեք չկրկնվի։

«Այսօր մենք գլուխ ենք խոնարհում 20-րդ դարի ամենասարսափելի ողբերգություններից մեկի՝ Հայոց ցեղասպանության հարյուր հազարավոր զոհերի հիշատակի առջև։ Անպաշտպան, անմեղ մարդկանց դաժան կոտորածը, որոնք սպանվեցին, վիրավորվեցին և վտարվեցին իրենց հայրենի քաղաքներից ու գյուղերից, ցնցեց ամբողջ քաղաքակիրթ աշխարհը, և դրա աղետալի հետևանքները հստակ ցույց տվեցին,  թե ինչի է հանգեցնում կրոնական թշնամանքի հրահրումը, ազգայնականությունը և այլատյացությունը։

Կցանկանայի նշել, որ մեր երկրի դիրքորոշումն այս հարցում միշտ անփոփոխ է եղել։ Դեռևս 1915 թվականի մայիսին այն արտացոլվել է Ռուսաստանի, Մեծ Բրիտանիայի և Ֆրանսիայի համատեղ հռչակագրում, որով դատապարտվում էր հայ ժողովրդի նկատմամբ բռնությունը որպես մարդկության և քաղաքակրթության դեմ հանցագործություն, իսկ պատմության ավելի ուշ շրջանում՝ Պետական ​​դումայի 1995 թվականի ապրիլի 14-ի հայտարարության մեջ։

Մենք վստահ ենք, որ ազգային պատկանելիության հողի վրա մարդկանց զանգվածային ոչնչացման և տեղահանման քաղաքականությունը չի կարող արդարացվել, և միջազգային հանրությունը պետք է միավորի ուժերը ապահովելու, որ նման բարբարոսությունը երբեք չկրկնվի։

Այդ տարիների հալածանքներն ու ճնշումները չբուժվող վերք դարձան հայերի բազմաթիվ սերունդների համար, բայց նրանց կրած ողբերգությունը միավորեց մարդկանց, ովքեր ցուցաբերեցին անսասան նվիրվածություն ավանդույթներին, իմաստությանը և քաջությանը: Վստահ եմ, որ Հայաստանի որդիներն ու դուստրերը կշարունակեն գնահատել իրենց ազգային ինքնությունը, հազարամյակների մշակույթը, լեզուն, ազատությունը և հոգևոր արժեքները։ 

Մաղթում եմ բարեկամ հայ ժողովրդին բարեկեցություն, բարգավաճում և ամենայն բարիք»,- նշված է Վ.Պուտինի ուղերձում։ 

2015 թվականի ապրիլի 24-ին, Երևան կատարած այցի ընթացքում, Վլադիմիր Պուտինը մասնակցել էր Ծիծեռնակաբերդի հուշահամալիրում տեղի ունեցած Հայոց ցեղասպանության զոհերի100-րդ տարելիցին նվիրված  հիշատակի արարողությանը։