Եկատերինբուրգի հայ համայնքի հետ քննարկվեցին Հայաստանի առջև ծառացած մարտահրավերները․ ցուցադրվեց «Կեղծ խաղաղության գինը» ֆիլմը (տեսանյութ)

Ապրիլի 19-ին Եկատերինբուրգում մեր հայրենակիցների հրավիրով բախտ վիճակվեց հանդիպել հայ համայնքի ներկայացուցիչների հետ, որի ընթացքում ցուցադրվեց նաև «Կեղծ խաղաղության գինը» փաստավավերագրական-խաղարկային ֆիլմը։

Եկատերինբուրգում ապրում է շուրջ 15 հազար հայ, որոնք ակտիվ գործունեություն են ծավալում քաղաքի տարբեր բնագավառներում՝ տնտեսականից մինչև սոցիալ-քաղաքական կյանք։ Միևնույն ժամանակ մեր հայրենակիցները ուշիուշով հետևում են մայր հայրենիքում տեղի ունեցող իրադարձություններին։

Հանդիպումն ու ֆիլմի ցուցադրությունը կազմակերպվել էին Եկատերինբուրգի հայ համայնքի նախագահ Մասիս Նազարյանի աջակցությամբ։ Միջոցառման կայացմանը գործուն մասնակցություն էին ցուցաբերել նաև Եկատերինբուրգի նորակառույց Սուրբ Հովհաննես Կարապետ եկեղեցու հոգևոր հովիվ Տեր Արիստակես քահանա Հովհաննիսյանն ու հայ համայնքի մեծ բարեկամ Օլեգ Գորոբեցը։

Ֆիլմի ցուցադրությունից առաջ ունեցած իր ելույթում Տեր Արիստակես քահանա Հովհաննիսյանը նշեց, որ պատմական հիշողության վերականգնումը այն գրավականներից մեկն է, որպեսզի թույլ չտրվի անցյալում տեղի ունեցած ողբերգական դեպքերի կրկնությունն այսօր։ Տեր Արիստակես քահանա Հովհաննիսյանը այն խիզախ հոգևորականներից է, որը 44-օրյա պատերազմի թեժ օրերին հոգևոր ծառայություն է իրականացրել Արցախում։

Հայ համայնքի ներկայացուցիչների կողմից հնչեցին մտահոգություններ Հայաստանում ստեղծված իրավիճակի վերաբերյալ։ Նրանք դատապարտում էին գործող իշխանությունների կողմից վարվող կործանարար քաղաքականությունը, որի արդյունքում Հայաստանը մենակ է մնացել աշխարհաքաղաքական բարդ պայմաններում։ Դժգոհություններ հնչեցին նաև այն մասին, որ բախտորոշ ժամանակներում Հայաստանի գործող իշխանությունները փչացրել են հարաբերությունները ռազմավարական դաշնակից Ռուսաստանի հետ, ինչը կարող է խիստ բացասաբար անդրադառնալ հատկապես Հայաստանի, ինչպես նաև Ռուսաստանի բազմամիլիոնանոց հայկական համայնքի վրա։

Եկատերինբուրգի հայ համայնքի նախագահ Մասիս Նազարյանը ՀՀ քաղաքացիներին կոչ արեց ակտիվորեն մասնակցել հունիսի 7-ի ընտրություններին և մերժել գործող իշխանություններին ու նրանց վարած դավադիր, անհեռատես քաղաքականությունը։

Որպես 5-րդ ալիքի կողմից նկարահանված «Կեղծ խաղաղության գինը» ֆիլմի փաստահավաք հեղինակ՝ ևս մեկ անգամ կարևորեցի պատմությունից դասեր քաղելու անհրաժեշտությունը՝ հակառակ դեպքում պատմությունը միշտ դաժանորեն պատժելու սովորություն ունի։ Իսկ ֆիլմի գլխավոր առաքելությունը անցյալում թույլ տրված սխալները ցուցադրելու միջոցով այսօր սթափության կոչ հնչեցնելն է։

Որպես «Մայր Հայաստան» կուսակցության ներկայացուցիչ՝ պատվավոր հյուրի կարգավիճակում Ուրալյան պետական տնտեսագիտական համալսարանի հրավերով ապրիլի 20-ին մասնակցեցի նաև Եկատերինբուրգում անցկացվող Եվրասիական տնտեսական ամենամյա ֆորումին։ «Ինֆորմացիոն տիրույթ․ լրագրությունը որպես ինտեգրացիայի և քաղաքակրթությունների երկխոսության գործիք» խորագիրը կրող մեդիաֆորումի ընթացքում կարևորվեց ժամանակակից աշխարհում հարափոփոխ աշխարհաքաղական պայմաններում պատասխանատու ԶԼՄ-ների դերն ու նշանակությունը։ Շեշտվեց, որ ԶԼՄ-ները մեծ նշանակություն ունեն ազգերի և պետությունների միջև կառուցողական երկխոսություն ծավալելու և կոնֆլիկտայնությունը նվազեցնելու գործում։

«Մայր Հայաստան» կուսակցության վարչության անդամ Դերենիկ Մալխասյանի ֆեյսբուքյան էջից