Զախարովա. ՌԴ-ից արցախցիներին տրամադրվող մարդասիրական օգնությունից հրաժարվելը պայմանավորված է ՀՀ իշխանությունների նախընտրական ցանկությամբ՝ ջնջել Ռուսաստանի մասին ցանկացած հիշատակում

Ռուսաստանի արտաքին գործերի նախարարության խոսնակ Մարիա Զախարովան այսօրվա ճեպազրույցում մեկնաբանել է այն տեղեկությունները, որ Երևանը մերժել է Ռուսաստանի նախաձեռնությունը՝ Արցախից տեղահանված անձանց մարդասիրական օգնություն տրամադրելու վերաբերյալ։

Նրա խոսքով, «Ռուսաստանը երբեք չի թողել վերոնշյալ տարածաշրջանի ժողովրդին առանց աջակցության և օգնության, երբեք անտարբեր չի մնացել Հայաստանում ապրող ղարաբաղցիների ճակատագրի նկատմամբ»։

 «Մոսկվան առաջիններից մեկն էր, որ մարդասիրական օգնություն ուղարկեց հանրապետություն, չնայած այն ժամանակ էլ Երևանը այդքան էլ գոհ չէր ռուսական կողմից ցուցաբերվող օգնությունից։ Բանը հասավ նրան, որ պաշտոնական խողովակներով ասում էին. «շնորհակալություն, բայց անհրաժեշտ չէ»։ Եվ հիմա կա նոր մերժում»,- ասել է նա

Զախարովան նշել է, որ այս ընթացքում օգնություն է տրամադրվել գրեթե 7000 ընտանիքի, մատակարարվել է սնունդ, առաջին անհրաժեշտության ապրանքներ և մասնագիտացված մանկական հավաքածուներ՝ մոտ 140 տոննա։

Նրա խոսքով, հիմնական կարիքների բավարարումը թույլ տվեց մարդկանց և Հայաստանի իշխանություններին ավելի շատ կենտրոնանալ ավելի հրատապ խնդիրների լուծման վրա, ինչպիսին են բնակարանային ապահովումը, զբաղվածությունը և սոցիալական վերաինտեգրումը։

«Ավելին, որոշ ապրանքներ և արտադրանք գնվել են անմիջապես Հայաստանում։ Սա, ըստ էության, լրացուցիչ խթան է հանդիսացել տեղական արտադրության և փոքր բիզնեսի համար և ստեղծել էական լրացուցիչ ազդեցություն»,- նշել է նա։

Ըստ Զախարովայի, օգնություն ստանալուց հրաժարվելը, հավանաբար, հասկանալի կլիներ, եթե օգնությունն այլևս անհրաժեշտ չլիներ, այդ դեպքում, ակնհայտ է, որ Ռուսաստանը նույնպես չէր առաջարկի այս օգնությունը, եթե դրա պահանջարկը չլիներ։

«Նման օգնություն ստանալու համար Հայաստանի քաղաքացիների դիմումների թիվը միայն աճել է։ Այնուամենայնիվ, այն հիմքը, որի հիման վրա Երևանը հրաժարվեց հաստատել հաջորդ խմբաքանակի մատակարարումը, ավելի շատ հարցեր է առաջացնում, քան պատասխաններ տալիս»,- ասել է նա։

Նա մեջբերել է Երևանի պատասխանը. «Հայաստանի իրավական նորմերը սահմանափակում են նվիրատվությունների, ինչպես նաև բարեգործական օգնության տրամադրումը նախընտրական շրջանում»։

Նրա խոսքով, ռուսական կողմը փորձել է պարզաբանել, թե կոնկրետ ինչ է նկատի առնվել, սակայն որևէ բացատրություն չի տրվել։

«Ակնհայտ է, որ Երևանի կողմից զուտ բարեգործական մարդասիրական օգնություն տրամադրելուց հրաժարվելը, որը որևէ քաղաքական ենթատեքստ չունի, պայմանավորված է իշխանությունների նախընտրական ցանկությամբ՝ բառացիորեն ջնջել Ռուսաստանի մասին ցանկացած հիշատակում։ Ո՞ւմ եք դրանով վատություն անում։ Իրենց սեփական քաղաքացիներին, ովքեր իսկապես կարիքի մեջ են», - ասել է Մ. Զախարովան։