Իրանը մտադիր է Մինաբի դպրոցի վրա հարձակման քննությանը ներգրավել միջազգային կազմակերպությունների

Թեհրանը փաստաթղթավորում է Իրանի հարավում գտնվող դպրոցի վրա հարձակման տվյալները, ինչի համար նախկինում մեղադրել էր ԱՄՆ-ին և Իսրայելին, և մտադիր է ներգրավել միջազգային կազմակերպությունների։ Այս մասին РИА Новости-ին հայտնել է Իրանի կառավարության պաշտոնական ներկայացուցիչ Ֆաթեմե Մոհաջերանին։

«Այս հարցը դիտարկվում է որպես միջազգային իրավունքի խախտում, ուստի իրականացվում է այդ հանցագործության մանրամասն փաստաթղթավորում։ Օրակարգում է նաև հարցի քննարկումը միջազգային իրավական խողովակներով, այդ թվում՝ մասնագիտացված միջազգային կազմակերպությունների միջոցով»,- ասել է նա։

Մոհաջերանին հստակեցրել է փետրվարի 28-ին Մինաբ քաղաքի «Շաջարե Թայեբե» դպրոցին հասցված հարվածի զոհերի տվյալները՝ հայտնելով, որ զոհվել է 168 աշակերտ, ինչպես նաև 14 ուսուցիչ և աշխատակից։ Ըստ նրա, դպրոցում ընդհանուր առմամբ աշխատում էր 35 մարդ։

«Նրանցից 8-ը ողջ են, 14-ը զոհվել են, իսկ 12-ը դեռևս համարվում են անհայտ կորած»,- նշել է նա՝ հրապարակելով դպրոցի 34 աշխատակիցների վերաբերյալ տվյալները։

Ըստ Մոհաջերանիի, Իրանի իշխանություններն ընդհանուր առմամբ փաստաթղթավորում են բոլոր այն դեպքերը, երբ քաղաքացիական բնակչությունը հայտնվել է հարվածների տակ։

«Փաստաթղթավորումը ներառում է տեղեկություններ դեպքի վայրից, բժշկական հաշվետվություններ, լուսանկարներ և այլ ապացույցներ։ Սա անհրաժեշտ է փաստաթղթավորված դեպքերը միջազգային ատյաններին ներկայացնելու և միջազգային իրավունքի շրջանակում դրանց քննությունն ապահովելու համար»,- հավելել է նա։
Աղբյուր՝ News.am