Վաշինգտոնն ու Թել Ավիվը հերթական անգամ վտանգավոր արկածախնդրություն են սկսել․ ՌԴ ԱԳՆ-ն Իրանի դեմ գործողության մասին
Վաշինգտոնն ու Թել Ավիվը հերթական անգամ վտանգավոր արկածախնդրություն են ձեռնարկել, որը տարածաշրջանն արագորեն մոտեցնում է հումանիտար, տնտեսական և, չի բացառվում նաև, ռադիոլոգիական աղետի։ Այս մասին ասված է Ռուսաստանի ԱԳՆ հայտարարության մեջ՝ կապված Իրանի դեմ ԱՄՆ-ի և Իսրայելի համատեղ գործողության հետ։
«Փետրվարի 28-ի առավոտյան ԱՄՆ-ի և Իսրայելի զինված ուժերը ձեռնամուխ են եղել Իրանի տարածքին ռազմաօդային հարվածներ հասցնելուն։ Այս անխոհեմ քայլին նախորդած ռազմաքաղաքական և քարոզչական նախապատրաստությունների մասշտաբն ու բնույթը, ներառյալ տարածաշրջանում ԱՄՆ-ի խոշոր ռազմական խմբավորման կուտակումը, կասկած չեն թողնում այն մասին, որ խոսքը ՄԱԿ-ի անդամ ինքնիշխան և անկախ պետության դեմ նախապես ծրագրված և չհրահրված զինված ագրեսիայի ակտի մասին է, որը խախտում է միջազգային իրավունքի հիմնարար սկզբունքներն և նորմերը», - ընդգծվում է գերատեսչության հայտարարության մեջ։
Ինչպես նշում է ՌԴ ԱԳՆ-ն, դատապարտման է արժանի նաև այն փաստը, որ հարձակումները կրկին իրականացվում են «վերսկսված բանակցային գործընթացի քողի տակ, որն իբր ստեղծվել է Իսլամական Հանրապետության շուրջ իրավիճակի երկարաժամկետ կարգավորումը ապահովելու և ի հեճուկս ռուսական կողմին փոխանցված այն ազդակներին, թե իսրայելցիները շահագրգռված չեն իրանցիների հետ ռազմական առճակատմամբ»։
«Միջազգային հանրությունը, ներառյալ ՄԱԿ-ի և ԱԷՄԳ-ի ղեկավարությունը, պարտավոր է անհապաղ օբյեկտիվ և անզիջում գնահատական տալ այս գործողություններին, որոնք ուղղված են Մերձավոր Արևելքում խաղաղության, կայունության և անվտանգության կործանմանը։
Վաշինգտոնն ու Թել Ավիվը հերթական անգամ վտանգավոր արկածախնդրություն են ձեռնարկել, որը տարածաշրջանն արագորեն մոտեցնում է հումանիտար, տնտեսական և, չի բացառվում, ռադիոլոգիական աղետի։ Ագրեսորների մտադրությունները հասկանալի են և նրանց կողմից հռչակվում են լիովին բացահայտ ձևով՝ տապալել սահմանադրական կարգը և ոչնչացնել իրենց համար անցանկալի պետության ղեկավարությանը, որը հրաժարվել է ենթարկվել ուժային թելադրանքին ու հեգեմոնիզմին։ Այս ձեռակերտ ճգնաժամի բացասական հետևանքների պատասխանատվությունը, ներառյալ անկանխատեսելի շղթայական ռեակցիան և բռնության պարուրակի սրումը, ամբողջությամբ ընկած է նրանց վրա», — նշվում է հայտարարության մեջ։
Ինչպես ընդգծում է Ռուսաստանի ԱԳՆ-ն, բացահայտորեն անտեսվում են չտարածման գլոբալ ռեժիմի վրա այդ չմտածված քայլերի ծանր հետևանքները, որի անկյունաքարը Միջուկային զենքի չտարածման մասին պայմանագիրն է (ՄԶՉՊ):
«Ընդ որում, ամերիկա-իսրայելական տանդեմը քողարկվում է կեղծ մտահոգությամբ, թե իբր իրանցիները չպետք է տիրապետեն միջուկային զենքի։ ԱԷՄԳ-ի երաշխիքների ներքո գտնվող միջուկային օբյեկտների ռմբակոծություններն անթույլատրելի են։ Իրականում Վաշինգտոնի և Թել Ավիվի դրդապատճառները որևէ ընդհանուր բան չունեն չտարածման ռեժիմի հետ։ Նրանք չեն կարող չհասկանալ, որ Մերձավոր Արևելքը նետելով անվերահսկելի էսկալացիայի հորձանուտի մեջ՝ փաստացիորեն դրդում են ողջ աշխարհին և նախևառաջ տարածաշրջանի երկրներին՝ առավել լուրջ միջոցներ ձեռնարկել՝ առաջացող սպառնալիքների դեմ։
Առանձնակի տագնապ է հարուցում ԱՄՆ վարչակազմի կողմից վերջին ամիսների ընթացքում իրականացվող աշխարհակարգի միջազգային-իրավական հիմքերի դեմ ուղղված ապակայունացնող հարվածների շարունակական բնույթը, որոնց թվում են՝ ներքին գործերին չմիջամտելը, ուժի կիրառման սպառնալիքից կամ դրա կիրառումից հրաժարվելը և միջազգային վեճերի խաղաղ կարգավորումը։
Պահանջում ենք անհապաղ վերադարձնել իրավիճակը քաղաքական-դիվանագիտական կարգավորման հունին։ Ռուսաստանը, ինչպես և նախկինում, պատրաստ է աջակցել խաղաղ լուծումների որոնմանը՝ միջազգային իրավունքի, փոխադարձ հարգանքի և շահերի հավասարակշռության հիման վրա», — հայտարարել են Ռուսաստանի արտաքին քաղաքական գերատեսչությունում։
Հետևեք մեզ Facebook-ում