Մեքսիկայում անկարգություններից հետո լրացուցիչ 2 հազար զինվորական է ուղարկվել Խալիսկո

Մեքսիկայի ազգային պաշտպանության նախարարության 2000 զինծառայողներ են ժամանել Խալիսկո նահանգ՝ անվտանգությունն ապահովելու նպատակով։ Այս քայլը ձեռնարկվել է «Խալիսկոյի նոր սերունդ» (CJNG) կարտելի պարագլխի լիկվիդացումից հետո բռնկված անկարգություններից հետո։ Այս մասին նահանգի կառավարության օպերատիվ խորհրդակցության ժամանակ հայտարարել է տարածաշրջանի նահանգապետ Պաբլո Լեմուսը։ Ելույթի տեսագրությունը հրապարակվել է նրա X էջում։

«Ժամանել են ազգային պաշտպանության նախարարության 2000 աշխատակիցներ՝ Խալիսկոյի փողոցներում պարեկություն իրականացնելու համար։ Այս ծառայողներն արդեն անցել են իրենց պարտականությունների կատարմանը», - նշել է Լեմուսը։ Նրա խոսքով՝ նահանգի իշխանությունները շարունակում են տարածաշրջանում բնականոն կյանքի աստիճանական վերականգնման, ինչպես նաև ավտոմոբիլային ճանապարհները երթևեկության համար վերջնականապես ազատելու ուղղությամբ իրականացվող աշխատանքները։ Ակնկալվում է, որ հասարակական տրանսպորտի համակարգը լիարժեք կգործի փետրվարի 24-ին։

Նահանգապետը հիշեցրել է, որ ստեղծված իրավիճակում նահանգում բոլոր հանրային միջոցառումները չեղարկվել են մինչև հետագա ծանուցում, իսկ ուսումնական հաստատություններում անձնական դասընթացները կասեցվել են։ Նա ընդգծել է, որ նահանգային իշխանությունները լիարժեք աջակցություն են ստանում դաշնային կառավարությունից։

Մեքսիկայի ազգային պաշտպանության նախարարությունը փետրվարի 22-ին հայտարարեց «Խալիսկոյի նոր սերունդ» նարկոկարտելի պարագլուխ Ռուբեն Օսեգերա Սերվանտեսի լիկվիդացման մասին։ Վերջինս առավել հայտնի է «Էլ Մենչո» մականվամբ։ Գերատեսչության տվյալներով՝ հանցագործը ծանր վիրավորում է ստացել Խալիսկո նահանգի Տապալպա քաղաքի մոտակայքում ուժայինների հետ զինված բախման ժամանակ և մահացել է հիվանդանոցի ճանապարհին։ Հատուկ գործողության իրականացումից հետո ամբողջ երկրով մեկ արձանագրվել են ավտոմայրուղիների զանգվածային փակումներ, մեքենաների և առևտրային ձեռնարկությունների հրկիզումներ։ Ինչպես հայտնել է հանրապետության նախագահ Կլաուդիա Շեյնբաումը, փետրվարի 23-ի դրությամբ երկրում հասարակական անվտանգության ոլորտում տիրող իրավիճակը լիովին վերահսկվում է։
Աղբյուր՝ News.am