Վազգեն Սաղաթելյանը կշարունակի մնալ բանտում. Փաստաբան

«Վերաքննիչ քրեական դատարանն անփոփոխ թողեց Վազգեն Սաղաթելյանի կալանքի որոշումը: Ցավոք, Վազգենը կշարունակի մնալ բանտում»,-քիչ առաջ տեղեկացրեց Վազգեն Սաղաթելյանի փոստաբան Արսեն Բաբայանը։

Հիշեցնենք, որ հունվարի 9-ին դատարանը ևս 3 ամսով երկարաձգեց հայ փոդքասթերներ Նարեկ Սամսոնյանի և Վազգեն Սաղաթելյանի նախնական կալանքը։ Նարեկ Սամսոնյանը հացադուլ հայտարարեց։ 15 օրյա հացադուլից հետո նա տեղափոխվեց հիվանդանոց, ենթարկվեց վիրահատության։ Այդ ընթացքում Վերաքննիչ դատարանը փոխեց նրա խափանման միջոց կալանքը՝ սահմանելով տնային կալանք։ Երեկ հիվանդանոցից դուրս գրված Սամսոնյանին տարան իր բնակության վայր՝ տնային կալանքը կրելու։

Փոդքասթերների դեմ քրեական հետապդում հարուցվեց ՀՀ երրորդ նախագահ Սերժ Սարգսյանի հետ հարցազրույցից հետո։ Դրան հաջորդող փոդքասթում Վազգեն Սաղաթելյանը բարձրաձայն կարդաց «Քաղաքացիական պայմանագիր» կուսակցության վարչության անդամ և Ազգային ժողովի նախագահ Ալեն Սիմոնյանի ֆեյսբուքյան գրառումը, որը նրանց անվանել էր «շան որդիներ»։

Ի պատասխան՝ Սաղաթելյանը նմանատիպ վիրավորանք էր հնչեցրել, որի համար փոդքասթերները հետագայում ձերբակալվել և մեղադրվում են «խուլիգանության» մեջ։ 2025 թվականի նոյեմբերի 14-ին փոդքասթերները ենթարկվել են երկու ամսվա նախնական կալանքի։ 2026 թվականի հունվարի 9-ին կալանքի ժամկետը երկարաձգվել է ևս 3 ամսով։ 2025 թվականի դեկտեմբերի 11-ին Եվրոպայի խորհրդի լրագրողների անվտանգության հարթակը հրապարակեց 1-ին մակարդակի ահազանգ Վազգեն Սաղաթելյանի և Նարեկ Սամսոնյանի կալանավորման, ինչպես նաև Antifake TV-ի գույքի առգրավման վերաբերյալ:

Իրավապաշտպաններ, քաղաքական ու հասարակական շատ գործիչներ համարում են, որ սա ազատ խոսքի դեմ իրականացրած գործողություններ են, որոնց նպատակն է լռեցնել Սամսոնյանին, Սաղաթելյանին։
Աղբյուրը` Panorama.am