Ըստ ամերիկյան The Washington Post-ի՝ Վաշինգտոն այցի ընթացքում Ալիևի թիկնապահները «իրենց վատ են պահել»

Ըստ թերթի թղթակիցներ Լիամ Սքոթի, Սեմի Ուեսթֆոլի և  Ջենի Գաթրայթի՝ այցի ընթացքում Իլհամ Ալիևի անվտանգության աշխատակիցները, բախվել են Վաշինգտոնում ցուցարարների հետ։

Ըստ տեղեկությունների՝ ցուցարարները պահանջել են ազատ արձակել ադրբեջանցի քաղբանտարկյալներին: Ակցիան տեղի է ունեցել այն հյուրանոցի մոտ, որտեղ հանգրվանել էր «Խաղաղության խորհրդի» նիստին մասնակցող Ալիևի  պատվիրակությունը: Քաղաքային ոստիկանությունը այս բախման դեպքերի վերաբերյալ հայտնել է, որ գործը փոխանցվել է Պետդեպարտամենտին:

Ադրբեջանում քաղբանտարկյալների ազատ արձակումը պահանջող ցուցարարները հայտնել են, որ հինգշաբթի կեսօրին իրենց վրա հարձակվել են նախագահ Իլհամ Ալիևի թիկնապահները: Հարձակումը տեղի է ունեցել Փենսիլվանիա պողոտայում գտնվող «Վալդորֆ Աստորիա» հյուրանոցի դիմաց, որը գտնվում է Սպիտակ տնից ընդամենը մի քանի թաղամաս հեռավորության վրա:

27-ամյա տաքսու վարորդ Ռահիմ Յագուբլուն, որի հայրը գտնվում է ադրբեջանական բանտում, ասել է, որ կանգնած է եղել հյուրանոցի դիմաց՝ ձեռքին ցուցանակ, երբ Ալիևի անվտանգության աշխատակիցները հարձակվել են նրա վրա։ Հարձակման հետևանքով կոտրվել է նար ծնոտը և նա հարված է ստացել որովայնին։ Մեկ այլ ցուցարար՝ 35-ամյա Ադիլ Ամրախլին, հարձակվողներից փախչելիս,վնասել է ոտքը։ Նա ասել է, որ առնվազն չորս այլ անձինք, այդ թվում՝ Յագուբլուն, վիրավորվել են։

Ալիևը, ով տասնամյակներ շարունակ երկաթե բռունցքով կառավարել է Ադրբեջանը, ժամանել է Վաշինգտոն՝ Դոնալդ Թրամփի կողմից հրավիրված «Խաղաղության խորհրդի» առաջին նիստին մասնակցելու համար, նշում է պարբերականը:

Վաշինգտոնի ոստիկանության խոսնակ Թոմ Լինչը հաստատել է, որ միջադեպի վայրում են եղել հատուկ գործողությունների բաժնի և ԱՄՆ գաղտնի ծառայության աշխատակիցները, հասկանալի է, որ այնտեղ են եղել նաև Ադրբեջանի անվտանգության աշխատակիցները։ Նա հրաժարվել է մանրամասնել, թե արդյոք իրավապահ մարմինները միջամտել են, այդ ծեծկռտուքին:

Թերթը նշում է, որ այս պատմությունը հիշեցնում է Թուրքիայի նախագահ Էրդողանի անվտանգության աշխատակիցների հետ կապված նմանատիպ միջադեպը: 2017 թվականին «Էրդողանի մարդիկ» բախում են ունեցել Վաշինգտոնում Թուրքիայի դեսպանի նստավայրի մոտ բողոքի ցույցի մասնակիցների հետ, որի հետևանքով վիրավորվել էր 11 մարդ, այդ թվում՝ մեկ ոստիկան: Մեկ տարի առաջ նրա անվտանգության աշխատակիցները բախվել էին Բրուքինգսի ինստիտուտի մոտ բողոքի ցույցի մասնակիցների հետ:

Ըստ թերթի, Ռահիմ Յագուբլուն սովորական ցուցարար չէր: Նրա հայրը՝ Թոֆիգ Յագուբլուն, ով հայտնի ադրբեջանցի ակտիվիստ է, արդեն կրել է ինը տարվա ազատազրկման մեկ տարին՝ խարդախության կեղծ մեղադրանքներով: Amnesty International-ը վստահ է, որ դատավճիռը «դատական ​​ֆարսի» արդյունք է, և Բաքվի կողմից այլախոհությունը ճնշելու արշավի վերջին քայլը: Կազմակերպությունը նկարագրել է Ադրբեջանում տեղի ունեցողը որպես՝ «կառավարության քննադատներին լռեցնել»:

Ադիլ Ամրախլին, որը Վիրջինիայից էր եկել բողոքի ցույցին, ասել էր, որ անվտանգության աշխատակիցները հարձակվել էին իրենց վրա, երբ ցուցարարները փորձել էին տեղափոխվել հյուրանոցի մեկ այլ մուտք՝ Ալիևի աննկատ ներս մտնելը կանխելու համար։ «Մենք ցանկանում էինք խաղաղ ճանապարհով պահանջել Ադրբեջանում քաղբանտարկյալների ազատ արձակումը», - բացատրել էր նա։

Կարելի է ասել, որ Ալիևը կրկնում է Էրդողանի քայլերը,այդ թվում՝նաև իր թիկնապահների  պահվածքի վարվելակերպով, ինչը նկատել էին նաև ամերիկյան շրջանակները:

Ալիևի թիմի նման պահվածքը ցույց է տալիս, որ նրանց համար ավտորիտար վարվելակերպը, ոչ թե պատահականություն է, այլ՝ օրինաչափություն:

Իսկ մի երկիր, որի ներքին կյանքում տիրում են նման խաղի կանոններ, չի կարող այլ վերաբերմունք դրսևորել արտաքին քաղաքականության մեջ, քանի որ երկրի արտաքին քաղաքականությունը, իր ներքին քաղաքականության տրամաբանական շարունակությունն է:

Նաև դրա համար է կարևոր, որ Հայաստանի և Ադրբեջանի միջև խաղաղ գործընթացը  ունենա երաշխավոր:

Քանզի, հույսը դնել Ալիևի գթասրտության վրա,ծիծաղելի մոտեցում է:

Սա է իրականությունը:

Արտակ Հակոբյան
Zham.am