Քաղաքապետարանը կարող էր քաղաքացիներին առաջարկել քնաբեր խմեն, որ Երևանն այդ վիճակում չտեսնեին. Պիպոյան

«Քաղաքապետարանի անգործության հետևանքով ոչ միայն բողոքներ ենք ստացել, այլ ցավակցություններ եմ հայտնել»,-արձագանքելով այսօր Երևանի քաղաքապետարանում գործակարգավարական խորհրդակցության ընթացքում հնչեցրած հայտարարություններին՝ Panorama.am-ի հետ զրույցում ասաց «Իրազեկ և պաշտպանված սպառող» ՀԿ նախագահ Բաբկեն Պիպոյանը։

Կազմակերպություն զանգահարած քաղաքացիներին Պիպոյանն ուղղորդել է քաղաքական իշխանությունների մոտ՝ հիշեցնելով, որ ձյան մաքրումը նրանց կողմից ապահովվելիք անմիջական գործառույթ է, ապա հուշել, որ  քաղաքային իշխանության անգործության հետևանքով կրած վնասների համար քաղաքացիները կարող են փոխհատուցում պահանջել դատական կարգով։

«Երևանում կոլապսը փաստ էր և տեսանելի։ Ավելին, ոչ միայն որպես սպառողների իրավունքների պաշտպան, այլև որպես քաղաքացի ինքս եմ բախվել խնդրին։ Մեր գրասենյակի հարակից տարածքում շատերն ուղղակի չեն կարողացել տեղաշարժել իրենց մեքենաները, այնքան վատ վիճակում են եղել ճանապարհները։ Ավելին, մեր մտերիմներից մեկը զանգել, կատակում էր, որ քաղաքապետարանը շատ ճիշտ է արել՝ չի մաքրել ճանապարհները, քանի որ ինքը սղացել, ընկել է, գլուխը բորդյուրին չի կպել ձյան հաստ շերտի շնորհիվ, հակառակ դեպքում գլուխը վնասելու էր։ Բացի այդ, անցած ուրբաթ օրն ակտիվորեն  համեմատություններ էին արվում, նայեք քաղաքի վիճակը, պատկերացրեք երկրի վիճակը»,-ասաց նա։

Ինքնահավանության բարձր մակարդակով ու ինքնաքննադատության բացակայությամբ օժտված քաղաքային իշխանության այսօր հնչեցրած հայտարարությունները Պիպոյանը զարմանալի չի համարում։

«Ձևական մի քանի արտահայտություն հնչեց, որ իբր դժգոհությունները հասկանալի են, բայց հաշվի առնելով ձյան ծավալը... Էդ ինչքա՞ն ձյուն էր եկել որ, ոչ ամբողջ գիշեր էր ձյուն եկել, որ առավոտյան տեխնիկան դժվարանար աշխատել, ցերեկը սկսել էին տեղումները։ Քաղաքային իշխանությունները պետք է հասկանային, որ ձյուն է գալու և տեխնիկան պետք է պատրաստ լիներ, ոչ թե սպասեին լրիվ սառեր, խցանումներ սկսեին։ Եթե տեխնիկան սկսեր աշխատել ժամը 15։00-ից, մենք ժամը 17։00-ին կլիներ նորմալ վիճակ, խցանումներ էլ չէին լինի»,-նշեց ՀԿ նախագահը։

Ինչ վերաբերում է քաղաքային իշխանությունների՝ ճանապարհների մաքրման մեթոդի ընտրության մասին հայտարարություններին, ապա Պիպոյանի խոսքով, այդ տրամաբանության մեջ կարող էին քաղաքացիներին առաջարկել քնաբեր հաբեր խմել, քնել  ու չնկատել, թե ինչ էր կատարվում այդ օրը քաղաքում։

«Նման հայտարարությունները միշտ արվում են մի նպատակով, ուզում են տպավորություն ստեղծել, որ փնտրում են լավագույն լուծումներ, իբր առկա լուծումները բավարար չեն խնդրի լուծման համար։ Ի՞նչ է, հին մեթոդներով հնարավո՞ր չէր քաղաքը մաքրել, իհարկե, հնարավոր էր»,-ասաց նա։

«Իրազեկ և պաշտպանված սպառող» ՀԿ նախագահը խայտառակություն է որակում այդ պայմաններում տրանսպորտի վատ աշխատանքն ու դրա մասին քաղաքապետարանի հայտարարությունը։

«Ամբողջ Երևանը կոլապսի մեջ է, իսկ քաղաքային իշխանությունները խոսում են, որ հնարավոր են տրանսպորտի ուշացումներ։ Պետք է հակառակը լիներ, տրանսպորտը պետք է հաճախ աշխատեր, որ մարդիկ իրենց մեքենաներով չտեղաշարժվեին։ Սա տրանսպորտի «բարեփոխման» իրական պատկերն էր։ Մենք բազմիցս ասել ենք,  բարեփոխված տրանսպորտ դա մի քանի շարժակազմի ավելացումն  ու ավտոբուսի գեղեցիկ տեսքը չեն։ Բարեփոխված տրանսպորտային համակարգն ամբողջական ենթակառուցվածքներն են՝ կանգառներով, տրանսպորտային միջոցների համապատասխան քանակով ու չվացուցակների ապահովմամբ»,-ընդգծեց նա։