ՌԴ ԱԳՆ-ն «Mariner» նավի առգրավումը որակել է որպես միջազգային իրավունքի խախտում

Ռուսաստանի արտաքին գործերի նախարարությունը ամերիկյան ուժերի կողմից «Mariner» լցանավի առգրավումն անվանել է միջազգային ծովային իրավունքի լուրջ խախտում։

«Բաց ծովում ամերիկյան ուժերի կողմից քաղաքացիական նշանակության նավի վրա նստելը և դրա փաստացի առգրավումը, ինչպես նաև անձնակազմի գերեվարումը, չի կարող մեկնաբանվել որպես որևէ այլ բան, քան միջազգային ծովային իրավունքի հիմնարար սկզբունքների և նորմերի, ինչպես նաև նավարկության ազատության կոպիտ խախտում։ Սա նավատիրոջ օրինական իրավունքների և շահերի էական խախտում է»,-«ՌԻԱ նովոստի»-ի փոխանցմամբ, ասվում է հայտարարության մեջ։

Նախարարությունը շեշտել է, որ Միացյալ Նահանգները բազմիցս տեղեկություններ է ստացել տանկերի ռուսական պատկանելության և դրա խաղաղ կարգավիճակի վերաբերյալ: Դիվանագետները պահանջել են, որ ամերիկյան իշխանությունները արժանապատիվ վերաբերմունքը ապահովեն նավի վրա գտնվող ռուս քաղաքացիների հանդեպ և չխոչընդոտեն նրանց վերադարձը հայրենիք: Նրանք նաև կոչ են արել վերադառնալ ծովային սկզբունքներին և անհապաղ դադարեցնել «Մարիների» դեմ անօրինական գործողությունները։

«Սուր միջազգային ՝ այդ թվում նաև վերջին տարիների անհամաձայնությունների պատճառով արդեն իսկ չափազանց լարված ռուս-ամերիկյան հարաբերությունների հետ կապված ճգնաժամեր ստեղծելու Վաշինգտոնի պատրաստակամությունը, ցավալի և մտահոգիչ է»,-հավելել է նախարարությունը։

Արտգործնախարարությունը պնդել է, որ «Մարիների» հետ կապված միջադեպը կարող է հանգեցնել եվրաատլանտյան տարածաշրջանում ռազմական և քաղաքական լարվածության հետագա սրման:

ԱՄՆ ռազմածովային ուժերը Հյուսիսատլանտյան օվկիանոսում լցանավի վրա են վայրէջք կատարել նախորդ օրը՝ ժամը 14:00-ին, որից հետո, նրա հետ կապը կորել էր։ Նավը դեկտեմբերի 24-ին ստացել էր Ռուսաստանի դրոշի ներքո նավարկելու ժամանակավոր թույլտվություն։
Աղբյուրը` Panorama.am