Ինչու է Վենեսուելայի իշխանափոխությունն ուրախացրել Նաթ Ռոտշիլդին

Հայտնի ֆինանսական դինաստիայի ներկայացուցիչ Նաթանայել (Նաթ) Ռոտշիլդն իր X-ի էջում գրել է, որ Մադուրոյի հեռացումը «հաղթանակ է ժողովրդավարության և ազատ շուկայի համար»։

Ֆինանսական վերլուծաբանները սա մեկնաբանում են որպես ազդակ այն մասին, որ միջազգային ներդրողները սպասում են Վենեսուելայի տնտեսության վերակազմավորմանը և համաշխարհային կապիտալի շուկաներ մուտքին, որոնք փակ էին պատժամիջոցների պատճառով։

Վենեսուելան ունի աշխարհի ամենամեծ արտաքին պարտքերից մեկը (մոտ 150 միլիարդ դոլար), որի զգալի մասը գտնվում է դեֆոլտի վիճակում։

Վենեսուելայի Կենտրոնական բանկը ամբողջությամբ պատկանում է պետությանը և վերահսկվում է կառավարության կողմից։ Ըստ այդմ` Մադուրոյի կառավարությունը բացարձակ վերահսկողություն ուներ ոսկու պահուստների և արտարժույթի վրա։ Ըստ վերլուծությունների` իշխանափոխությունը կարող է հանգեցնել այս ակտիվների «ապասառեցմանը» արտասահմանյան բանկերում (օրինակ՝ Մեծ Բրիտանիայի բանկում պահվող վենեսուելական ոսկին)։

2024 թվականին Վենեսուելայի կառավարությունը վարձել էր Rothschild & Co. ընկերությանը՝ որպես ֆինանսական խորհրդատու, արտաքին պարտքը գնահատելու համար։ Նաև նպատակ ուներ գույքագրել պարտատոմսերը և հասկանալ, թե ինչպես կարելի է բանակցել արևմտյան պարտատերերի հետ։

Մադուրոյի տեղափոխումը ԱՄՆ և Ռոտշիլդների նման ֆինանսական խոշոր խաղացողների հետաքրքրվածությունը ևս մեկ անգամ հաստատում են, որ այս գործընթացը միայն քաղաքական չէ, այլ նաև խոշոր ֆինանսական վերաբաշխում է տեղի ունենում։ Վենեսուելան ունի նավթի ամենամեծ պաշարներն աշխարհում, և նոր կառավարության օրոք այդ ռեսուրսների արդյունահանումը կարող է ամբողջությամբ փոխել համաշխարհային էներգետիկ շուկան։

Հրապարակման պատրաստեց 168.am-ը։