Երեխաները սառում են, բլինչիկները՝ հալվում, ձկները՝ սատկում. Ի՞նչ վիճակում են Էրեբունիի բնակիչները

Երևանի Էրեբունի վարչական շրջանում արդեն երրորդ օրն է՝ բնակիչները մնացել են առանց էլեկտրամատակարարման։ Ձմռան ցրտին շատերը զրկված են ոչ միայն լուսավորությունից, այլև ջեռուցումից։

Աթոյան փողոցի բնակիչ Գայանե Վահանյանը Panorama.am-ի հետ զրույցում պատմում է, որ գիշերները ստիպված է շորերով քնել․
«Գիշերը փաթաթվում եմ, շորերով եմ քնում, այ ժակետներս նայեք, նասկիներս։ Հիմա գնամ աղջկաս տուն, մի քիչ տաքանամ, հեռախոսս զարյադկա դնեմ, էլի գամ այստեղ»։

Բնակիչը նշում է, որ չի էլ պատկերացնում՝ երբ կլինի հոսանքը։ Հեռախոսն անջատված է, նորություններից կտրված։ Անհանգստացած է նաև սառնարանում պահվող մթերքի համար․ Նոր տարվա համար նախապես առևտուր էր արել ու պահել սառցախցիկում։

«Խոզի բուդը, բլինչիկները արել, դրել եմ սառցախցիկում, չգիտեմ՝ ինչքան կմնա։ Ուտելիքի մի մասը հանել եմ, դրսում դրել։ Մտածում եմ՝ մյուս մասն էլ տանեմ, դրսում թողնեմ, բայց վախենում եմ՝ գողանան»,- ասում է նա։

Տիկին Կարինեի մանկահասակ որդին նոր է դուրս գրվել հիվանդանոցից։ Բուժում է ստացել թոքաբորբի դեմ։ Երեխային փաթաթում են ծածկոցներով, միացնում գազի բոլոր աչքերը, որ երեխայի մոտ հիվանդությունը չկրկնվի։

Էլեկտրաէներգիայի երկարատև բացակայությունը խնդիրներ է ստեղծել նաև տնտեսվարողների համար։ Տարածքում խանութների մեծ մասը փակ է, սեփականատերերը խուսափում են տեսախցիկների առջև խոսելուց։ Նրանցից մեկը ցույց է տալիս խանութում գտնվող ձկների ակվարիումը․ լույսի բացակայության և ցրտի պատճառով ձկները սատկել են։

Վթարի հետևանքով երկարատև հոսանքազրկումը խնդիրներ է առաջացրել երթևեկության համար. լուսացույցները չեն աշխատում։

«Հայաստանի էլեկտրական ցանցեր» ընկերությունը հայտնում է, որ «Վարդաշեն» 110/35/6 կՎ ենթակայանում առաջացած հրդեհի հետևանքով շարքից դուրս են եկել 6 կՎ սնող թվով 23 բջիջներ, ինչի արդյունքում մի շարք հասցեներ մնացել են առանց էլեկտրամատակարարման։ Ընկերության փոխանցմամբ՝ իրականացվում են վերականգնողական աշխատանքներ։

ՀԷՑ-ի նախնական գնահատմամբ՝ էլեկտրամատակարարումը ամբողջությամբ կվերականգնվի այսօր՝ մինչև ժամը 22:00։

Վթարի վերաբերյալ հաղորդում է ներկայացվել իրավապահ մարմիններին։ Քննչական կոմիտեն Panorama.am-ին տեղեկացրել է, որ հաղորդման հիմքով հանցակազմի բացակայության պատճառով քրեական վարույթ չի նախաձեռնվել, կազմվել է համապատասխան արձանագրություն և ուղարկվել հսկող դատախազին՝ հաստատման։

Հիշեցնենք, որ ամիսներ առաջ վարչապետ Նիկոլ Փաշինյանը հայտարարել էր ՀԷՑ-ը պետականացնելու գործընթաց սկսելու մասին։ ՀԾԿՀ որոշմամբ ընկերությունը զրկվել է լիցենզիայից, իսկ կառավարման համար նշանակվել է ժամանակավոր կառավարիչ՝ ՔՊ-ական Ռոմանոս Պետրոսյանը։
Տեսանյութ՝ նաև այս հղումով
https://www.youtube.com/watch?v=HEKpsPqvHLQ
Աղբյուր՝ Panorama.am