Հ1-ի Ամանորի եթերացանկում կաթողիկոսի ուղերձն ընդգրկված չէ
Հանրային հեռուստաընկերությունը հրապարակել է Ամանորի ծրագիրը, որտեղ ընդգրկված չէ Կաթողիկոսի ուղերձը: Ըստ Հանրայինի կայքում տեղադրված դեկտեմբերի 31-ի եթերացանկի՝ ժամը 22-ի հատվածում ուղերձներ են հղելու նախագահն ու խորհրդարանի խոսնակը, իսկ տարեմուտին՝ 23:40-ին նախատեսված է միայն վարչապետի ուղերձի հեռարձակումը, փոխանցում է Ազատություն-ը։
Նախորդ երկու տարիներին Հանրային հեռուստաընկերությունը հրաժարվել էր կաթողիկոսի ուղերձը տարեմուտին՝ երկրի ղեկավարի շնորհավորանքից առաջ հեռարձակելու երկարամյա ավանդույթից: Մայր Աթոռին առաջարկվել էր Վեհափառի խոսքը եթեր հեռարձակել ժամը 22-ի հատվածում, Էջնիածինը մերժել էր այս առաջարկը:
--
Մեր կողմից նկատենք, որ սա միանգամայն կանխատեսելի էր՝ հաշվի առնելով այն մաղձաթաթավ թշնամանքն ու դրան զուգահեռվող գործողությունները, որ Փաշինյանի իշխանությունն ուղղում է Հայ առաքելական եկեղեցու դեմ:
Այնուհանդերձ, Հ1-ը ՀՀ հարկատուների միջոցներով գոյություն ունի, իսկ այդ հարկատուների ճնշող մեծամասնությունը Հայ առաքելական եկեղեցու զավակներ են: Ըստ էության, Ամենայն Հայոց կաթողիկոսի ամանորյա ուղերձը չհեռարձակելը Հ1-ի կողմից հայ քրիստոնյաների նկատմամբ կրոնական խտրականության և խղճի ազատության սկզբունքների կոպիտ ոտնահարում կարող է որակվել:
Հետևեք մեզ Facebook-ում