Կառավարությունը լուծարեց «Շողակաթ» հեռուստաընկերությունը

Կառավարությունը չզեկուցվող  հարցերի փաթեթով ընդունեց որոշում, որով լուծարեց «Շողակաթ» հեռուստաընկերությունը։

Նախագծի հիմնավորման մեջ ասվում է. «Սույն նախագծով առաջարկվում է լուծարել «Հոգևոր-մշակութային հանրային հեռուստաընկերություն» փակ բաժնետիրական ընկերությունը, որի լուծարման հիմք է հանդիսանում 2025 թվականի հոկտեմբերի 24-ի «Տեսալսողական մեդիայի մասին» օրենքում փոփոխություն կատարելու մասին» N ՀՕ-329-Ն օրենքը։

«Հոգևոր-մշակութային հանրային հեռուստաընկերություն» փակ բաժնետիրական ընկերությունը (այսուհետ նաև՝ Ընկերություն) ստեղծվել է Հայաստանի Հանրապետության կառավարության 2011 թվականի փետրվարի 24-ի թիվ 216-Ն որոշմամբ, որով Ընկերության բաժնետոմսերի կառավարման լիազորությունները վերապահվել են Հանրային հեռուստառադիոընկերության խորհրդին:

Ընկերության գործունեության հիմնական տեսակը հոգևոր և մշակութային հեռուստատեսային հաղորդումների արտադրությունն ու հեռարձակումն է»։

Ըստ հիմնավորման՝ Նախագիծը բխում է Հայաստանի Հանրապետության կառավարության 2021 նոյեմբերի 18-ի թիվ 1902-Լ  որոշմամբ  հաստատված  ՀՀ կառավարության կառավարության 2021-2026 թվականների գործունեության միջոցառումների ծրագրի «Տարածքային կառավարման և ենթակառուցվածքների նախարարություն» բաժնի 103-րդ կետից, այն է՝ մասնավորեցման ոչ ենթակա պետական մասնակցությամբ առևտրային կազմակերպությունների կազմի և կառուցվածքի օպտիմալացում, ըստ ճյուղերի թվաքանակի սահմանում։

Նախորդ ամիս խորհրդարանն ընդունել էր ՔՊ-ական պատգամավորներ Սիսակ Գաբրիելյանի և Թագուհի Ղազարյանի առաջարկած փոփոխությունները, ըստ որոնց՝ հանրային հեռուստաալիքները երեքից դառնում են երկուսը։ Այդ փոփոխության միակ նպատակը Մայր Աթոռին վնասելն ու վերջին շրջանում բավական ընդդիմադիր դիրքերից հանդես եկող հեռուստաընկերությունը պարզապես փակելն է։