«Ուխտավորներից՝ ուղտին». քաղաքացու ինքնատիպ ակցիան՝ ի պատասխան ռեժիսոր Ռուբեն Բաբայանի հայտարարության

Քաղաքացին յուրատիպ բողոքի ակցիա է իրականացրել Թումանյանի անվան պետական տիկնիկային թատրոնի դիմաց՝ ի պատասխան օրերս Հանրային հեռուստաընկերության եթերում թատրոնի նախկին տնօրեն, Հանրային խորհրդի անդամ, ռեժիսոր Ռուբեն Բաբայանի աղմկահարույց հայտարարության։ 

Քաղաքացին ճիպոտը կապել է թատրոնի դռանը, ինչպես նաև փակցրել է «Ուխտավորներից՝ ուղտին», «Մտրակվորական ճիպոտ. բռնություն չի, զուտ հումար» գրություններով թղթեր։ 

Հիշեցնենք, որ Ռուբեն Բաբայանն ասել էր. «Դատական որոշում կա միայն Միքայել Սրբազանի վերաբերյալ։ Կարծում եմ՝ խիստ է։ Ամբաղ-զամբաղ խոսելու համար 2 տարի տալը խիստ է։ Միգուցե կզարմանաք, բայց կառաջարկեի ներմուծել Իրանից պատժամիջոց․ իրենք ասում են փետուրով խփել՝ ճիպոտավորել։ Այդ հանցանքը ոչ այն է անպատիժ թողել, ոչ այն է բանտ նստացնել։ Մեր շատ անբախ-զամբախ խոսողները,  եթե իմանային նման պատիժ գոյություն ուներ, կխուսափեին դրանից»։ 

Նրա այս հայտարարություն բուռն քննադատության արժանացավ հենց արվեստագետների կողմից։ Այնուհետև նա aravot.am-ին ասել էր. «Դա ասված էր հումորով: Գուցե հաջող էր կամ անհաջող էր, բայց ասված էր հումորով: Ես 68 տարեկան մարդ եմ, որից 45 տարին աշխատում եմ թատրոնում, 30 տարի ինստիտուտում և այդ տարիների ընթացքում երբևէ ոչ մեկը չի լսել ինձնից բռնության կոչ կամ վիրավորական խոսք որևէ մեկի հասցեին չի լսել: Պարզ է, որ դա բացարձակապես հումորային էր ասված, դե հիմա այդպես է ընկալվել, ես հո չեմ արդարանալու ու ասեմ՝ ես ուղտ չեմ»։ 
--
Տեսանյութը կարելի է դիտել այս հղումով՝
https://www.facebook.com/watch/?v=868295662588291