Միքայել Սրբազանի գործով առաջին նիստը նշանակվել է օգոստոսի 15-ին

Շիրակի Թեմի առաջնորդ արքեպիսկոպոս Միքայել Աջապահյանի գործով առաջին նախնական դատալսումներ են նշանակվել։ Panorama.am-ը Դատալեքսից տեղեկացավ, որ առաջին նիստը նշանակվել է օգոստոսի 15-ին ժամը 14։30-ին։

Հիշեցնենք, որ գործը մակագրված է դատավոր Արմինե Մելիքսեթյանին։ Դատարանին քրեական գործի հետ հանձնվել է երկու փաթեթ իրեղեն ապացույց։

Ըստ Դատալեքսում հրապարակված մեղադրական եզրակացության համառոտ բովանդակության, Գևորգ /Միքայել/ Արտաշեսի Աջապահյանին մեղադրանք է առաջադրվել այն բանի համար, որ նա ունենալով արքեպիսկոպոսի հոգևոր աստիճան և հանդիսանալով Հայ Առաքելական Սուրբ Եկեղեցու Շիրակի թեմի առաջնորդը, պարբերաբար հրապարակային ելույթներով հանդես գալով զանգվածային լրատվության միջոցներով, ունենալով մեծ թվով հետևորդներ և հետևաբար նաև՝ իր խոսքով հասարակության անդամների վարքագիծն ուղղորդելու զգալի հնարավորություն, համաձայն չլինելով ներքին և արտաքին քաղաքականության հետ կապված հարցերի վերաբերյալ ՀՀ կառավարության դիրքորոշումների օգտագործելով զանգվածային լրատվության միջոցները, տեղեկատվական ու հաղորդակցական տեխնոլոգիաները, նախ՝ 2024թվականի փետրվարի 3-ին՝ ապա նաև՝ 2025թվականի հունիսի 21-ին, զանգվածային լրատվության միջոցների ներկայացուցիչներին տրված հարցազրույցների ընթացքում հնչեցրել է իշխանությունը զավթելուն ուղղված հրապարակային կոչեր։