Իշխանություններն այդ ծանրաձողը չկարողացան վերցնել, գցեցին իրենց ոտքին, այնուհետև Արցախը ճանաչեցին Ադրբեջանի մաս․ Սեյրան Օհանյան

 ««Արցախյան բանակցություններ» գրքում նշված են Արցախի ձևավորման իրավական հիմքերը և բանակցային ողջ գործընթացը՝ Մինսկի համանախագահության շրջանակներում, որը ձևավորել և նաև արտացոլվել է տարբեր փաստաթղթերում։ Փաստաթղթերի հիմքում ընկած է եղել Արցախի ինքնորոշումը»,- այս մասին «Արցախյան բանակցություններ» գրքի շնորհանդեսի ընթացքում լրագրողների հետ զրույցում ասաց ԱԺ «Հայաստան» խմբակցության ղեկավար Սեյրան Օհանյանը։

Նշենք, որ գրքի հեղինակը նույն խմբակցության պատգամավոր Արթուր Խաչատրյանն է։

«Արցախը Խորհրդային Միության փլուզման շրջանակներում, ինչպես մնացած բոլոր պետությունները Խորհրդային Միության օրենքների համաձայն ինքնորոշվել են, Արցախի ժողովուրդը արտահայտել է իր կամարտահայտությունը, և Արցախի Հանրապետությունը Հայաստանի հետ միասին է դե ֆակտո ինտեգրված վիճակում ապահովել է իր զարգացումը։  Այս ժամանակահատվածում գրքի լույս տեսնելը շատ մեծ հարված է Նիկոլ Փաշինյանի այն գործունեությանը, որը ինքը իրականացրել է Արցախի հանդեպ։ Արցախը հասցրել է հայաթափման, իհարկե, հիմնական հանցագործն  Ադրբեջանն է։ Բայց հանցակից են նրան նաև Հայաստանի Հանրապետության այսօրվա իշխանությունները Նիկոլ Փաշինյանի գլխավորությամբ, որոնք  ի սկզբանե ասում էին՝ « Արցախ, Հայաստան է և վերջ»,  այդ ծանրաձողը իրենք չկարողացան վերցնել, գցեցին իրենց ոտքին, և այնուհետև Արցախը ճանաչեցին Ադրբեջանի  մաս։ Այս գրքի մեջ նշված բոլոր փաստերը ներկայացնելու են այն բոլոր իրողությունները, որոնք իրականացվել են Արցախի ամբողջ պատմության ընթացքում»,- ասաց Սեյրան Օհանյանը։
Աղբյուրը` Panorama.am