Փաշինյանն ու Ալիևը նախատեսում են հանդիպել Դուբայում այս ամսվա վերջին. Middle East Eye

Middle East Eye-ը տեղեկացել է, որ Նիկոլ Փաշինյանը և Ադրբեջանի նախագահ Իլհամ Ալիևը մտադիր են այս ամսվա վերջին հանդիպել Դուբայում, քանի որ երկու երկրները շարունակում են բանակցությունները խաղաղության համաձայնագրի շուրջ։

Վերջին անգամ երկու ղեկավարները հանդիպել են մայիսին՝ Ալբանիայի մայրաքաղաք Տիրանայում անցկացված Եվրոպական քաղաքական համայնքի գագաթնաժողովի շրջանակում, որտեղ նրանք խոստացել են բաց պահել հաղորդակցության ուղիները, հիշեցնում է լրատվամիջոցը։

«Թեև Հայաստանը և Ադրբեջանը մարտին համաձայնության եկան խաղաղության համաձայնագրի նախագծի շուրջ, Բաքուն դեռևս մի քանի լրացուցիչ պայմաններ է պնդում՝ նախքան համաձայնագիրը պաշտոնապես ստորագրելը: Ադրբեջանը պահանջում է, որ Երևանը փոփոխություններ մտցնի իր սահմանադրության մեջ՝ վերացնելով Ադրբեջանի տարածքին վերաբերող հղումները, դադարեցնելով Եվրոպական Միության մոնիթորինգային առաքելության (EUMA) գործունեությունը Հայաստանում և լուծարելով ԵԱՀԿ Մինսկի խումբը, որին Բաքուն մեղադրում է կողմնակալության մեջ վերջին երեք տասնամյակների ընթացքում»,-գրում է Middle East Eye-ը:

Իրավիճակին ծանոթ երկու աղբյուրներ MEE-ին հայտնել են, որ Դուբայում նախատեսված հանդիպումը դրական նշան է, որը ցույց է տալիս, որ չնայած շարունակվող տարաձայնություններին, «երկու կողմերն էլ շարունակում են պատրաստակամ լինել համագործակցել»։

«Հաջորդ տարի Փաշինյանին ընտրություններ են սպասվում, և փորձագետները նշում են, որ քիչ հավանական է, որ նա կարողանա սահմանադրական հանրաքվե անցկացնել քվեարկությունից առաջ։ Միևնույն ժամանակ, Թուրքիան Բաքվին աննկատ կոչ է անում ստորագրել խաղաղության համաձայնագիրը՝ հիշեցնելով Ադրբեջանի պաշտոնյաներին տարածաշրջանում փոփոխվող դինամիկայի մասին, մասնավորապես՝ Իրանի թուլացող ազդեցությունը։ Անկարայի՝ Հայաստանի հետ հարաբերությունների կարգավորման գործընթացը կապված է Ադրբեջանի և Հայաստանի միջև հնարավոր խաղաղության համաձայնագրի հետ»,-գրում է լրատվամիջոցը։

Թուրք պաշտոնյաները Հայաստանը համարում են այսպես կոչված Միջին միջանցքի հիմնական երկիր, որը Թուրքիան ուղղակիորեն կկապի Կենտրոնական Ասիայի հետ, նշել է MEE-ն։

«Թուրքական ընկերությունները ևս հետաքրքրված են Հայաստանում ենթակառուցվածքային նախագծերին մասնակցելու հարցում։ Հակառակ Բաքվի առարկություններին, աղբյուրները հայտնել են, որ Թուրքիայի նախագահ Ռեջեփ Թայիփ Էրդողանը անցյալ ամիս ընդունել է Փաշինյանին՝ Հայաստանի առաջնորդի Թուրքիա կատարած առաջին պաշտոնական այցի ժամանակ։ Ադրբեջանի և Արաբական Միացյալ Էմիրությունների հարաբերություններին ծանոթ մեկ այլ աղբյուր նշել է, որ Ալիևը սերտ հարաբերություններ է պահպանում Արաբական Միացյալ Էմիրությունների կառավարիչ Մոհամմեդ բին Զայեդ ալ Նահյանի հետ։ Աղբյուրը հավելել է, որ Արաբական Միացյալ կովկասյան երկու ժողովուրդների միջև հարաբերությունները բարելավելու իր ջանքերի շրջանակում Էմիրությունները պատրաստ է իր հարկի տակ ընդունել բանակցությունների անցկացումը»,- գրում է պարբերականը։

Աղբյուրը՝ news.am