Ադրբեջանի ՆԳՆ-ն Բաքվի Sputnik-ի գրասենյակում «գործողություն» է իրականացնում

Ադրբեջանի ներքին գործերի նախարարությունը հայտարարել է, որ Բաքվում Sputnik–ի գրասենյակում «գործողություն» են իրականացնում, խմբագրությունը դեռ կապի դուրս չի եկել Մոսկվայի հետ, հաղորդում է ՌԻԱ Նովոստին։

Sputnik Ադրբեջանի գրասենյակում խուզարկությունը տեղի է ունենում Ռուսաստանի և Ադրբեջանի հարաբերությունների վատթարացման ֆոնին։ Այն սկսվել է Եկատերինբուրգում ադրբեջանցիների զանգվածային ձերբակալությունից հետո, որոնք մեղադրվում են 2000-ականների սկզբին կատարված սպանությունների և մահափորձերի համար։

Քննության ընթացքում ձերբակալվել են ՌԴ վեց քաղաքացիներ, ազգությամբ ադրբեջանցի Մազահիրը, Ակիֆը, Բաքիր և Այազ Սաֆարովները, ինչպես նաև Ալիխան Գանջիևը և Շահին Լալաևը։ Քննչական կոմիտեի տվյալներով՝ մեղադրյալները ներգրավված են եղել մի շարք սպանությունների և մահափորձերի մեջ, որոնց դրդապատճառը բիզնեսում ազդեցության բաժանումն էր։ Հիմնական կասկածյալներից երկուսը՝ եղբայրներ Հուսեյն և Զիյադդին Սաֆարովները, մահացել են քննչական գործողությունների ընթացքում։ Նախնական տվյալներով՝ նրանցից մեկը մահացել է սրտի անբավարարությունից, երկրորդի մահվան պատճառը պարզվում է։

RT-ի գլխավոր խմբագիր Մարգարիտա Սիմոնյանը արձագանքել է իրադարձություններին՝ գրելով. «Հատուկ գործողություն։ Հզոր է»։ Նա նշել է, որ Բաքվում ՌԴ դեսպանատան աշխատակիցներն արդեն մեկնել են Sputnik Ադրբեջանի գրասենյակ, որտեղ այժմ «հատուկ գործողություն» է տեղի ունենում։

«Աշխատակիցները կապի դուրս չեն գալիս. ակնհայտորեն, նրանք հեռախոսի հասանելիություն չունեն։ Նրանց թվում Ռուսաստանի քաղաքացիներ կան»,–հավելել է Սիմոնյանը։

Ավելի վաղ Ադրբեջանի մշակույթի նախարարությունը հայտարարել էր հանրապետության տարածքում ՌԴ պետական ​​և մասնավոր հաստատությունների բոլոր միջոցառումների չեղարկման մասին։

ՌԴ դեսպանատան հյուպատոսական բաժնի աշխատակիցներին թույլ չեն տալիս հանդիպել ռուսական լրատվամիջոցի լրագրողների հետ Բաքվում՝ առանց որևէ պատճառաբանության։ Այս մասին ՌԻԱ Նովոստիին հայտնել է ՌԴ ԱԳՆ պաշտոնական ներկայացուցիչ Մարիա Զախարովան։

«Ռուսաստանի դեսպանատան հյուպատոսական բաժնի աշխատակիցներին թույլ չեն տալիս հանդիպել ռուսաստանցի լրագրողների հետ։ Նման գործողությունների պատճառների մասին տեղեկություն չեն տրամադրում»,–ասել է ՌԴ ԱԳՆ պաշտոնական ներկայացուցիչը։

Նա նաև նշել է, որ Բաքվում գտնվող ՌԴ դիվանագետները երկու ժամից ավելի է՝ չեն կարողանում կապ հաստատել Ռուսաստանի քաղաքացի հանդիսացող լրագրողների հետ։

Զախարովան հավելել է. «Անհանգստացած ենք մեր լրագրողների համար»։

«Ռուսաստանի դեսպանատունը տեղեկացրել է Ադրբեջանի ԱԳՆ–ին, ՆԳՆ–ին և պետական ​​անվտանգության ծառայությանը, սակայն պատասխան դեռ չկա»,-եզրափակել է նա։

Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան, մեկնաբանելով ռուսաստանցի դիվանագետին Ադրբեջանի ԱԳՆ կանչելու մասին տեղեկությունը, ՌԻԱ Նովոստիին հայտնել է, որ Ռուսաստանի Դաշնության գործերի ժամանակավոր հավատարմատարը տվել է անհրաժեշտ բացատրությունները, իրավիճակը գտնվում է իրավապահ մարմինների վերահսկողության տակ։ Նրա խոսքով՝ նախորդ տարիներին կատարված ծանր հանցագործությունների փաստի վերաբերյալ քրեական գործերի քննության շրջանակներում ՌԴ իրավապահ մարմինները ձերբակալություններ և խուզարկություններ են իրականացրել «կասկածյալների բնակության վայրերում, որոնք Ադրբեջանում ծնված ՌԴ քաղաքացիներ են»։

Աղբյուրը՝ arm.sputniknews.ru