Ինձ ավելի շատ անհանգստացնում է իմ երկրի վիճակը, իմ վնասվածքը չի կարող ինձ հետ պահել իմ գաղափարներից. Ակցիայի ժամանակ մատները կորցրած Եսայի

Ուղիղ մեկ տարի առաջ Բաղրամյան պողոտայում՝ ԱԺ մոտ, ոստիկանության կողմից լուսաձայնային նռնակներ կիրառելու հետևանքով մատները կորցրած Եսայի Քարամյանն այսօր փորձում է ապրել սովորական կյանքով՝ նեղություն չտալ կողքիններին, իր կյանքն էլ դասավորել այնպես, ինչպես մինչ 2024 թվականի հունիսի 12-ը։

«Մեծ  առումով ոչ մի բան չի փոխվել, քանի որ մարդու կյանքը պայմանավորող առաջին գործոնը մարդու գլուխն է, գիտակցությունը։ Եթե այդ առումով ամեն ինչ նորմալ է, մարմնական թերությունների հետ կարելի է մի կերպ հաշտվել, համակերպվել, հարմարվել։ Բնականաբար, դժվարություններ կան, բայց փորձում եմ իմ կյանքը հնարավորինս նորմալ շարունակել՝ ոչ ինձ նեղություն տալ, ոչ կողքիններիս»,- Panorama.am-ի հետ զրույցում ասաց Եսային։

Միաժամանակ ընդգծեց, որ ամեն դեպքում վնասվածքը լուրջ է. «Ցավերը, վիրահատություններն անցյալում են, բայց մարմնական թերությունն ողջ կյանքի համար է։ Բայց կապրեմ, ոչինչ։  Ինձ ավելի շատ անհանգստացնում է  իմ երկրի վիճակը, քան իմ մարմնական վնասվածքները»։

Եսային ասաց, որ լրացուցիչ վիրահատության կարիք չկա, իմաստ էլ չունի, քանի որ վնասվածքներն այնպիսին են, որ այս վիճակից ավելի լավ՝ դժվար լինի։

«Մարմնի այդ մասը վերականգնելու որևէ տարբերակ  չկա։ Չեմ մտածել մատների պրոթեզավորման մասին։ Դա բան էլ չի տա, քանի որ վնասվածքն այնպիսին է, որ պրոթեզավորումը ֆունկցիոնալ առումով  բան չի տա, չի լինի ավելի լավ, քան հիմա է»։

Եսայի Քարամյանը տուժող է ճանաչվել ՀՀ Քրեական օրենսգրքի 441-րդ հոդվածով (Պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը) նախաձեռնված վարույթի շրջանակներում։

Այս մեկ տարվա ընթացքում Եսային հարցաքննվել է դեպքի առաջին օրերին՝ հիվանդանոցում։

«Քրեական գործով առաջնթաց չկա։ Հարցաքննվել եմ հիվանդանոցում։ Ձևական բնույթ էր կրում այդ հարցաքննությունը, ընդամենը գալչկա դնելու համար էր, դրանից հետո որևէ գործընթաց չի եղել, չեն էլ կանչել նոր հարցաքննության։

Այս իշխանության օրոք որևէ ակնկալիք չունեմ, որ կարող է որևէ առաջընթաց լինի այս գործով»,- ասաց Եսայի Քարամյանը։

Թեև այս ամենին՝ անհրաժեշտության դեպքում Եսային կրկին դուրս կգա փողոց։

«Միանշանակ, կմասնակցեմ ակցիաների, ցույցերի, բայց կախված է նրանից, թե ովքեր են փողոց դուրս գալու կոչ անում, ինչքանով է դա լուրջ։  Իմ վնասվածքները չեն կարող ինձ հետ պահել իմ գաղափարներից, իմ մտքերից»,- ասաց Եսայի Քարամյանը։