Տապալել եք թե՛ պետական, և թե՛ համայնքային կառավարումը. հե-ռա-ցե՛ք

4 Հունիս, 2025 10:48

Ավինյանական քաղաքային իշխանությունը «մուտիլովկա» է անում, իր սխալ կառավարման կամ կառավարել չկարողանալու հետևանքները ցանկանալով բարդել ընդդիմադիրներ վրա: Կարճ ասած՝ նույն նիկոլական զզվելի ու վախկոտաբնորոշ պահվածքն է, թե՝ «ե՞ս եմ մեղավոր»: Սրանց գլխավոր տակտիկան նույնն է. ամեն ինչում միշտ մեղավոր են ուրիշները, իսկ իրենք մշտական անմեղ են, իրենք մեղք չունեն, գրեթե հրեշտակներ են: Հիմա էլ, տեսեք-տեսեք՝ Ավինյանը չի կարողանում նոր ավտոբուս-տրոլեյբում ձեռք բերել, որովհետև... իրենց ներդրած կլպողական ուղեվարձի դեմ բոյկոտ է եղել, չնայած ակտիվ բոյկոտի ժամանակ ասում էին՝ «բոյկոտ չկա», վարորդներին դրդում էին ուղևորների դեմ խուլիգանության ու լկտի պահվածքի, դիմում էին նիկոլական իշխանավորներին բնորոշ ողորմելի քայլերի...

Ավագանու «Մայր Հայաստան» խմբակցության անդամ Արմենակ Դանիելյանն այդ առնչությամբ նկատում է.
«Քաղաքային իշխանությունը իր ապիկար ու անգրագետ կառավարման պատճառով բախվել է խնդիրների, որի մեղավորը հենց ինքն է իր սխալ կառավարմամբ, սխալ կանխատեսումներով, սխալ հաշվարկներով ու սխալ պլանավորմամբ։

Փետրվար, մարտ, ապրիլ ամիսներին պնդում էիք թե բոյկոտ չկա, մարդիկ համաձայն են նոր ու թանկ սակագնին, ուղեվարձը վճարում են և բոյկոտը չի ստացվեում, իսկ հիմա խոստովանում եք, որ ձեր պլանավորած գումարը չի հավաքվում, որովհետև բոյկոտը եղել է, կա ու շարունակվում է:

Պարոնայք տապալվածնե՛ր, չփորձեք ձեր սխալ կառավարման հետևանքով առաջացած խնդիրները գցել ընդդիմության, կամ ժողովրդի գրպանը, չփորձեք բյուջեի թերհավաքագրումների մեղավոր կարգել ընդդիմությանը, կամ ժողովրդին։

Բյուջեն թերհավաքվում է, որովհետև ժողովուրդը հասկացել է, որ այս թանկացումները անհիմն են, ոչ նպատակային և միտված են քաղաքացու գրպանը մտնելուն, մարդկանց թալանելուն։

Փաստ է, որ 100 դրամ ուղեվարձի ժամանակ ավելի շատ էր հավաքագրումը քան 150 դրամի ժամանակ։ Փաստ է, որ կանխիկ վճարումների ժամանակ ավելի շատ էր հավաքագրումը քան անկանխիկ վճարումների ժամանակ։

Հիշեցնեմ, որ «Մայր Հայաստանը» ի սկզբանե դեմ էր Երևանում հանրային տրանսպորտի ուղեվարձի թանկացմանը և 2 անգամ որոշման նախագիծ բերեց ավագանու օրակարգ, որով նախատեսվում էր տրանսպորտի ուղեվարձը սահմանել առավելագույնը 100 դրամ, իսկ քաղաքային իշխանությունը փախավ այդ նիստերից, իբր բոյկոտեց, խուսափելով փաստարկված ու հիմնավորված նախագծի ընդունումից, որը բխում էր քաղաքացիների շահերից և որոշման ընդունման դեպքում նաև մենք կոչ կանեինք քաղաքացիներին պարտադիր և պարտաճանաչ վճարել ուղեվարձը կամ գնել տրանսպորտի երթևեկության փաթեթներ։

Հ. Գ.

Տղե՛րք, չի ստացվում ձեր մոտ։ Չի՛ ստացվում կառավարել ոչ մի ոլորտում, ոչ մի մակարդակում։ Դուք տապալել եք թե՛ պետական կառավարումը և թե՛ համայնքային կառավարումը։ Տապալել ու տապալվել եք ամենուր և ամեն տեղ ու տարբեր իրավիճակներում։

Կառավարումը թթու թան չի,

Ամեն մարդու խելքի բան չի։
Հեռացե՛ք, պարոնայք, ՀԵՌԱՑԵ՛Ք»։