Արցախի Հանրապետությունը նոր նախագահ կունենա

Մայիսի 26-ին, ըստ ամենայնի, Արցախը կունենա նոր նախագահ։

Սահմանադրության համաձայն՝ 7 օրվա ընթացքում պետք է առաջադրվեն թեկնածուներ, և ոչ ուշ քան 10 օրվա ընթացքում պետք է ընտրվի նոր նախագահ։

ԱԺ պատգամավոր Մետաքսե Հակոբյանը «Փաստինֆո»-ին հայտնել է, որ հնարավոր է՝ արդեն երկուշաբթի օրը հարցը լուծված լինի, և Արցախն ունենա նախագահ։

Նա խնդրել է չկենտրոնանալ կոնկրետ անձերի վրա՝ նշելով․

«Գլխավորն այն է, որ մենք կարողացանք պահպանել նախագահի ինստիտուտը։ Սահմանադրական փոփոխությունները կարևորագույն քայլն էին, որ արդեն արվել են։ Մնացածը տեխնիկական հարցեր են։ Կլինի պաշտոնական հաղորդագրություն»։

Ինչպես արդեն հայտնել ենք, երեկ տեղի է ունեցել Արցախի Հանրապետության Ազգային ժողովի նոր նախագահի ընտրությունը։ Միաձայն ԱԺ նախագահ է ընտրվել Աշոտ Դանիելյանը։

Հիշեցնենք, որ նախկին նախագահ Դավիթ Իշխանյանը 2023 թվականի սեպտեմբերից գտնվում է ադրբեջանական գերության մեջ։